Urbanismo

– A alcaldesa, Digna Rivas, e os concelleiros Antonio Cabaleiro e Roberto Villar, reuníronse coa dirección do CEIP Laredo e da ANPA para tratar os graves problemas de seguridade que sofre o centro ante o risco de desprendemento de tellas. Ante a falta de resposta por parte da Xunta de Galicia, o Concello asumirá os traballos urxentes de permietrar a zona e instalar unha rede para evitar accidentes.

– Rivas afirma que “por responsabilidade” o Concello acometerá estas obras, malia ser competencia da Xunta, porque o primeiro “é garantir a seguridade do alumnado, familias, profesorado e viandantes”. A alcaldesa demanda á Consellería de Educación “que de maneira urxente poña data para facer a reforma integral da cuberta do CEIP Laredo, unha obra imprescindible para garantir a seguridade no centro”.

A alcaldesa de Redondela, Digna Rivas, e os concelleiros de Urbanismo, Antonio Cabaleiro, e de Infraestruturas, Roberto Villar, reuníronse onte co director do CEIP Laredo, Abraham Domínguez, e o presidente da ANPA do centro, Martín Diéguez. A xuntanza tiña como obxectivo tratar os graves problemas de seguridade que sofre o centro debido ao mal estado da súa cuberta, co risco de desprendemento de tellas. O Concello de Redondela enviou hai un mes un informe técnico á Consellería de Educación da Xunta de Galicia advertindo da grave situación que presenta o tellado do centro. O informe advirte das “medidas de seguridade urxentes” que se deben adoptar, como a colocación dun valado perimetral para “garantir que ninguén poida acceder ao perímetro de seguridade”, así como unha rede de seguridade “para evitar que se desprenda calquera elemento da cuberta”.

Ante a falta de resposta por parte da Xunta de Galicia, Digna Rivas comprometeuse coa dirección e a ANPA do colexio a asumir desde o Concello eses traballos de maneira urxente “malia ser unha competencia exclusiva da Xunta”. A alcaldesa afirma que o primeiro “é garantir a seguridade dos máis de 180 alumnos e alumnas do centro, así como das familias, profesorado e viandantes que pasan pola beirarrúa do colexio”. Rivas sinala que “por responsabilidade” o Concello acometerá as obras “para perimetrar toda a zona que presenta risco de desprendemento para evitar calquera accidente, coa instalación dunha estrutura e unha rede de protección”. Os técnicos do Concello puxeron xa e marcha os trámites para a contratación destes traballos que poderían comezar a finais deste mes, ou comezos de febreiro. Rivas agradeceu a colaboración da dirección do centro e da ANPA, que se puxeron a total disposición do Concello.

A rexedora lamenta que despois dun mes de comunicar esta grave situación á administración responsable, o Concello aínda non obtivo resposta por parte da Xunta de Galicia “que é a administración que ten a competencia en materia de Ensino”. Rivas demanda á administración autonómica “que de maneira urxente poña data e prazos concretos para facer a reforma integral da cuberta do CEIP Laredo, unha obra imprescindible para garantir a seguridade no centro, tal como advirte o informe técnico”.

– O proxecto presentado polo Concello de Redondela ao Plan Extra da Deputación vai transformar un espazo de case 2.300 metros cadrados no centro da vila, que agora se limita a unha zona de paso. Crearase unha nova área de lecer e convivencia que será un referente urbano e mellorará a mobilidade dos veciños e veciñas. O orzamento supera os 877.000 euros.

– Un ascensor de aceiro, vidro e aluminio permitirá salvar o gran desnivel entre avenida Ernestina Otero e a rúa Subida á Estación. A alcaldesa, Digna Rivas, explica que “agora é moi complicado acceder a pé a esta zona pola elevada pendente, sobre todo para persoas con mobilidade reducida”.

Transformar a contorna do edificio de Don Pancho, que acollerá o futuro Viveiro de Empresas no que xa traballa Zona Franca, é o obxectivo do Concello de Redondela. Trátase dun céntrico espazo da vila, na intersección da Avenida Ernestina Otero e a Rúa Miña, cara ao interior do tecido urbano. O proxecto do goberno de Digna Rivas, que se presentou ao Plan Extra da Deputación de Pontevedra, consiste na remodelación integral do espazo entre os edificios existentes e a praza pública coñecida como “praza da Petanca”. A actuación contempla a creación dun auditorio ao aire libre na parte traseira do edificio de pedra, unha nova praza pública na parte dianteira, e a instalación dun ascensor para salvar o gran desnivel da zona, o que permitirá o acceso á rúa Subida á Estación Vella.

A alcaldesa explica que o obxectivo principal desta actuación é “revitalizar un espazo que actualmente se limita a unha zona de paso para crear unha nova área de esparexemento e convivencia no centro da vila que será un referente urbano”. A instalación do ascensor permitirá resolver “un gran problema de mobilidade nesta zona, conectado de xeito accesible a parte baixa e parte alta, que ten unha elevadísima pendente”. O estudo Naos Arquitectura, encargado de redactar o proxecto, explica que o propósito é “outorgar coherencia e uniformidade a toda a praza e ao espazo situado fronte ao edificio existente”. A superficie total da actuación é de 2.296 m², cun presuposto de 877.438 euros.

Rivas aclara que se optou por esta proposta para enviar á Deputación de Pontevedra “porque cumpre cos criterios que demanda o ente provincial”. Rivas advirte que se esixen uns requisitos “moi estritos” para poder optar ao Plan Extra “e non vale calquera proxecto”. Por outra banda, esta era a mellor opción “debido ao escaso prazo que deu a Deputación para presentar actuacións, de tan só 20 días”.

Praza pública renovada

Na zona da praza consérvase a árbore existente e tamén a pérgola cunha parra. O proxecto contempla a instalación de novos pavimentos e vexetación, tanto na parte dianteira como no lateral do edificio de Don Pancho. A praza servirá de antesala a o novo Viveiro de Empresas que xa ten e marcha Zona Franca. Haberá distintas zonas verdes e unha bancada forrada en madeira. Tamén se engadirán módulos para aparcar bicicletas, papeleiras e nova iluminación. Substituiranse as luminarias existentes por un novas tipo LED de maior eficiencia enerxética, de baixo consumo e gran duración.

Auditorio ao aire libre

Na parte posterior da parcela prevese a construción dunha bancada aproveitando a pendente natural do terreo. Crearanse terrazas para transformar a zona nun auditorio ao aire libre para eventos e actividades promovidas polo Concello. Actualmente o espazo xa se utiliza como escenario para actuacións do Festival Internacional de Títeres. A bancada será de formigón forrada en madeira e materase a vexetación incluíndo novos arbustos e árbores.

Ascensor

Un ascensor de aceiro, vidro e aluminio permitirá salvar o gran desnivel da zona e mellorar a mobilidade. O elevador unirá verticalmente a avenida Ernestina Otero coa rúa Subida á Estación. Nesta parte alta hai un centro de día, unha escola infantil e un centro de fisioterapia, ademais de moitas vivendas. A alcaldesa explica que “agora é moi complicado acceder a pé a esta zona desde o centro da vila, porque a pendente é moi elevada”. A dificultade é maior aínda para persoas con mobilidade reducida “e o novo ascensor porá fin a estes problemas”.

– A alcaldesa, Digna Rivas, explica que os traballos van facer que esta céntrica zona sexa máis accesible para os peóns, facilitando os desprazamentos das persoas con mobilidade reducida. Están a instalaranse beirarrúas máis amplas que contará con novo mobiliario urbano e iluminación máis eficiente.

– Crearanse máis zonas verdes e de esparexemento. A actuación contempla tamén un escenario e unha fonte lúdica na zona sur. Os traballos están moi avanzados na primeira fase, na rúa das Cardosas, e continuarán nas rúas Salgueiral e un tramo de Ernestina Otero. O proxecto conta cun orzamento de case un millón de euros.

A alcaldesa de Redondela, Digna Rivas, e o concelleiro de Urbanismo, Antonio Cabaleiro, visitaron as obras de humanización do Salgueiral, que avanzan a bo ritmo. Os traballos inclúen unha nova urbanización na rúa das Cardosas, Salgueiral e Ernestina Otero. A humanización nas Cardosas, a primeira fase, xa está moi avanzada coas novas beirarrúa de pedra, e as obras continuarán coas seguintes fases nas rúas Salgueiral e un tramo de Ernestina Otero.

A alcaldesa sinala que o obxectivo fundamental desta actuación é “a revitalización dun espazo público deteriorado e que é central na vida da vila”. As obras van permitir que esta céntrica zona de Redondela sexa “máis accesible para todas as persoas, dando prioridade aos peóns e facilitando os desprazamentos das persoas con mobilidade reducida”. Están a instalarase beirarrúas máis amplas de pedra, que contarán con novo mobiliario urbano e iluminación máis eficiente. Crearanse máis zonas verdes e a actuación contempla tamén un novo escenario e unha fonte lúdica na zona sur, nun espazo que actualmente se emprega como escenario no Festival Internacional de Títeres.

Para minimizar as posibles afeccións destas obras á circulación, recoméndase como alternativa para os non residentes o desvío dos vehículos pola praza de Ponteareas.

As obras comezaron o pasado mes de setembro, e está previsto que rematen no segundo trimestre do próximo ano. O proxecto, por importe de case un millón de euros, fora acordado no anterior mandato dentro do plan provincial da Deputación PON2030.