Medio Ambiente

• Logo das limpezas realizadas durante o inverno para retirar o lixo arrastrado polos temporais, os traballos centráronse agora na posta a punto dos areais e da súa contorna, paseos e xardíns. As limpezas están a realizarse na praia de Cesantes, na de Arealonga, en Chapela, e na praia de Rande.

• O espazo natural da praia de Cesantes é tamén obxecto de traballos para a rexeneración e mellora dos ecosistemas dunares, intermareais e do esteiro da enseada de San Simón. O Concello de Redondela e Galicia Suroeste asinaron un convenio de colaboración para protexer este enclave de gran valor ecolóxico. O proxecto inclúe a retirada manual de especies invasoras e de residuos para recuperar as especies autóctonas e o equilibrio ecolóxico deste espazo natural.

Coa chegada da primavera e nos días previos ás festividades de Semana Santa, o departamento de Medio Ambiente do Concello de Redondela deixou en estado de revista as praias do municipio. Logo das limpezas realizadas durante o inverno para retirar o lixo arrastrado polos temporais, os traballos centráronse agora na posta a punto dos areais e da súa contorna. As limpezas están a realizarse na praia de Cesantes, na de Arealonga, en Chapela, e na praia de Rande.

Os traballos na praia de Cesantes inclúen tamén a reparación dalgúns elementos de madeira danados polos temporais deste inverno e dun aseo, que tiña os paneis deteriorados. A limpeza dos areais está a facerse de xeito manual, e tamén se traballa na contorna das praias. Estes días están a facerse labores de limpeza e mantemento nos xardíns e paseos, co baldeo e acondicionamento destas zonas de esparcemento. Os areais estarán en perfecto estado nesta Semana Santa, “a mágoa é que o mal tempo non permita gozar deles plenamente”, lamenta o concelleiro de Medio Ambiente, Alberto Álvarez.

Rexeneración dunar en Cesantes

O espazo natural da praia de Cesantes é tamén obxecto dun proxecto para a rexeneración e mellora dos ecosistemas dunares, intermareais e do esteiro da enseada de San Simón. O Concello de Redondela e Galicia Suroeste asinaron un convenio de colaboración para protexer este enclave de gran valor ecolóxico. Os traballos inclúen a retirada manual de especies invasoras e de residuos sólidos urbanos nunha área de 15.000 metros cadrados na zona supralitoral da praia. O obxectivo é recuperar as especies autóctonas e o equilibrio ecolóxico deste espazo natural para e favorecer “o uso recreativo, educativo e turístico da contorna”.

Tamén se está a realizar un inventariado xeral de especies de flora e fauna autóctonas en 80.000 metros cadrados da propia enseada de San Simón, zonas adxacentes á praia de Cesantes, o Paseo da Portela e Punta Socorro. O inventario recollerá moitas especies de aves migratorias que fan a súa parada na enseada, e tamén anfibios, réptiles e mamíferos que poden ser observables por persoas usuarias e turistas de forma fácil.

A iniciativa inclúe a creación dunha guía didáctica en formato dixital para divulgar o proxecto entre os visitantes e turistas “que servirá para poñer en valor este espazo natural con vistas á promoción de novos produtos turísticos sostibles”.

– A actuación abarcará aproximadamente 3.000 m² de superficie, co obxectivo de transformar a rúa Manuel Rodríguez Casal nun camiño seguro para os escolares que favoreza a autonomía infantil. Ao mesmo tempo mellorarase a calidade ambiental da zona con vexetación autóctona e instalarase novo mobiliario urbano e iluminación eficiente. O proxecto conta cun orzamento superior aos 770.000 euros

– A alcaldesa, Digna Rivas, destaca que este proxecto crea contornos “máis amables para os peóns, reduce a velocidade do tráfico e mellora a accesibilidade para todos, especialmente para o alumnado do CEIP Laredo e as familias”.

O Concello de Redondela opta aos fondos europeos con grandes proxectos que se inclúen no PAI (Plan de Acción Integrado) un instrumento clave para abordar algúns dos retos destacados na Axenda Urbana. Pensando nos peóns, e especialmente na rapaza, inclúese no PAI o proxecto “Camiños escolares seguros”.

A alcaldesa, Digna Rivas, explica que se trata de crear espazos para favorecer a autonomía infantil. A actuación abarcará aproximadamente 3.000 m² de superficie, co obxectivo de transformar a Rúa Manuel Rodríguez Casal nunha contorna “máis segura, accesible e amable para os peóns, especialmente para os nenos e nenas que estudan no CEIP Laredo”. Para iso crearase unha plataforma única, con medidas de redución de velocidade para o tráfico. Nun tramo dus 300 metros de lonxitude realizarase un cambio funcional, estético e ambiental. Este proxecto non só garantirá un acceso máis seguro ao CEIP Laredo de Chapela, “senón que tamén servirá como modelo para futuras intervencións de humanización noutros colexios do municipio, promovendo contornas urbanas adaptadas a colectivos vulnerables como a infancia”.

Como complemento á humanización levarase a cabo un proceso de naturalización da contorna para mellorar a calidade ambiental da zona e a integración paisaxística. Incorporarase vexetación autóctona para reducir o impacto ambiental, favorecer a absorción de CO2 e mitigar o efecto do calor. Instalarase novo mobiliario urbano e iluminación led eficiente, “co que se mellora tanto a seguridade nocturna como a habitabilidade do espazo”, apunta Rivas. Con este enfoque “non só se mellora a seguridade e comodidade dos camiños escolares, senón que tamén creamos grandes refuxios climáticos públicos”, conclúe a alcaldesa. O proxecto está orzamentado en 776.820 euros, dos que 466.092 corresponden á creación do camiño escolar e o resto, 310.000 728, para a mellora ambiental e mobiliario urbano.

O proxecto definiuse logo de reunións con diferentes axentes implicados e sesións de traballo coas áreas municipais. A través destes encontros, identificouse a perdida de autonomía da infancia hoxe en día e a necesidade de mellorar a seguridade e accesibilidade en contornas escolares, o que levou á incluír esta intervención no PAI da Axenda Urbana de Redondela.

O obxectivo deste PAI é “revitalizar e mellorar a calidade de vida , a accesibilidade e a sostibilidade urbana”. Entre os proxectos están o novo Centro Sociocultural de Chapela, a reforma do Mercado Municipal, o Museo Etnográfico Ángel Barros e obras de humanizacións e eficiencia enerxética. No casco histórico contémplanse actuacións para eliminar barreiras arquitectónicas e habilitar espazos de convivencia entre os cidadáns.

A alcaldesa sinala que son proxectos “estratéxicos para o futuro de Redondela” e asegura que sairán adiante “malia que os grupos da oposición votaron en contra en dúas ocasións, prexudicando así os intereses dos veciños e veciñas de Redondela”.

Rivas destaca “a madurez” dos proxectos seleccionados, que é un dos requisitos para poder optar aos fondos europeos. As propostas incluídas no PAI contan xa cos traballos técnicos avanzados para facilitar a licitación das obras. Son proxectos “realistas e moi necesarios para facer realidade nun prazo de entre 2 e 4 anos”, afirma a rexedora. Os fondos FEDER financiarían un 60% do custe dos traballos, e o 40% restante o propio Concello.

Co gallo da celebración do Día Mundial de Auga, ponse en marcha un concurso de debuxo que organiza Aqualia en colaboración coa Concellería de Medio Ambiente do Concello de Redondela. Esta actividade, de ámbito local, está dirixa ao alumnado de 3º e 4º de primaria dos centros educativos de Redondela. Os nenos e nenas teñen que deseñar un cartel sobre o coidado da auga e do medio ambiente para acadar un desenvolvemento sostible e mellorar o planeta.

Desde Aqualia, empresa concesionaria do abastecemento e saneamento da auga, ofrecen aos centros de ensino de Redondela un completo programa de actividades que acompaña ao concurso de debuxo. Trátase de cómics, vídeos de animación educativos, xogos e unidades didácticas sobre o cambio climático e a relevancia do ciclo integral da auga. Os protagonistas da campaña son uns superheroes chamados “Gardiáns Sostibles”, encargados de protexer o planeta e que inculcan aos nenos e nenas actitudes sostibles para o seu día a día.

Para os gañadores do concurso haberá tres premios: unha tableta para o gañador e un reloxo intelixente para cada un dos dous finalistas.

O prazo de presentación dos debuxos é desde o 22 de marzo ata o 22 de maio.

A alcaldesa de Redondela, Digna Rivas, e os concelleiros Iván Valles (Ensino), Alberto Álvarez (Medio Ambiente) e Roberto Villar (Sostibilidade) participaron na presentación desta campaña xunto con Ramiro Gutiérrez, Xefe de servizo de Aqualia en Redondela. Desde o Concello de Redondela animan a todos os nenos e nenas a participar no concurso e aprender máis sobre o ciclo da auga e a súa importancia para a nosa saúde e para o medio natural.