Medio Ambiente

O punto limpo móbil é un espazo que percorre as diferentes parroquias cuns horarios e puntos prefixados, co fin de que a veciñanza poida depositar os pequenos residuos domésticos para os que non existen colectores na vía pública.

Este é un servizo gratuíto de recollida para particulares do Concello de Redondela.

¿QUÉ RESIDUOS PODO TIRAR?

• Aceite de cociña usado embotellado

• Tóner impresora

• Radiografías

• Lámpadas e fluorescentes

• Cd / Dvd

• Cápsulas de café

• Cargadores e auriculares

• Pilas e baterías

• Material de escritura

• Móbiles e tabletas

• Pequenos electrodomésticos

• Material informático

• Aerosois e envases de pintura

• Plásticos (non envases) e xoguetes

• Xoguetes con elementos mecánicos ou electrónicos

• Textil

Lembra!

Está prohibido depositar residuos fóra do punto limpo móbil.

Debemos lembrar que para outro tipo de residuos máis voluminosos contamos xa cun servizo de recollida porta a porta, é tan sinxelo como contactar con Urbaser no teléfono 986 388 111, en horario de 9 a 14 h. e se lle informará do día e lugar no que pode depositar estes residuos.

DATAS E UBICACIÓN DO PUNTO LIMPO MÓBIL

• Diante da Casa Consistorial, do 24 de xuño ao 7 de xullo

• A semana do 8 ao 14 de xullo en Chapela. Aparcadoiro da rúa Manuel Rodríguez Casal.

PARA MAIS INFORMACIÓN

986 388 111 De luns a sábado, de 9h a 14h.

A concellería de Medio Ambiente, que dirixe Pilar Martínez, celebrou hoxe o Día Mundial do Medio Ambiente cunha actividade con escolares. Nenos e nenas participaron esta mañá nunha xornada formativa sobre a importancia da reciclaxe, de manter limpas as zonas públicas e o respecto aos espazos naturais. A xornada rematou cun paseo pola senda do río Pexegueiro, onde os escolares puideron coñecer a biodiversidade da contorna.

A actividade levouse a cabo en colaboración con Urbaser, a empresa responsable da recollida de residuos en Redondela, e coa participación de persoal do Plan Municipal de Voluntariado.

– A concellería de Sanidade e Medio Ambiente, que dirixe Pilar Martínez, pon en marcha unha campaña de información para previr o risco das mordeduras de carrachas. Lembra aos donos de fincas que deben mantelas limpas, e aos propietarios de animais de compañía que teñen a obriga de mantelos en bo estado de saúde.

– Os protocolos de actuación do Sergas e o Ministerio de Sanidade distribuiranse nos centros de ensino, centros de día, asociación e outros colectivos.

– Para minimizar os riscos de proliferación do mosquito tigre é importante retirar do exterior todos os obxectos que poidan acumular auga (pratos de testos, cinceiros, cubos, xoguetes) ou darlles a volta para evitar que se enchan con auga de choiva.

Coa chegada do bo tempo proliferan os insectos, e desde a concellería de Sanidade e Medio Ambiente de Redondela lembran a importancia de cumprir coa normativa vixente para evitar picaduras que poidan supoñer un perigo para a saúde. “A picadura dunha carracha pode transmitir varias enfermidades graves”, explica a concelleira Pilar Martínez, por iso o Concello está a alertar á poboación e fai recomendacións sobre como protexerse ante unha mordedura. As carrachas poden habitar parques, xardíns e bosques e morder tanto aos seres humanos como aos animais de compañía, polo que hai que lembrar aos propietarios de fincas “que deben mantelas limpas”. Para evitar riscos Pilar Martínez sinala que é importante acudir a estes espazos con pantalóns longos e botas para evitar o risco de mordedura. Unha vez na casa, e especialmente no caso de nenos e nenas, a concelleira recomenda “revisar a roupa e tamén a pel e a cabeza para asegurarnos de que non hai ningún parásito”. No caso dos propietarios de cans e gatos, suxírese estar atentos a calquera molestia que poidan manifestar ao volver da rúa, especialmente se estiveron en contacto con céspede e arbustos. A concelleira advirte ademais que é obriga dos propietarios manter en bo estado aos animais “tanto pola propia saúde das mascotas como por saúde pública, xa que cans e gatos poden transmitir enfermidades e parásitos ás persoas”. Desde a Policía Local levarase a cabo un control dos animais, e os propietarios poden ser requiridos para comprobar que cans e gatos están rexistrados, vacinados e coa desparasitación correcta”, advirte Martínez.

No caso de detectar algunha carracha, hai retirala da pel inmediatamente “pero é moi importante seguir as indicacións dos expertos para evitar que parte do insecto quede dentro da pel”. Para retiralas hai que tirar delas cunhas pinzas ou cunha ferramenta deseñada para este efecto. É necesario usar pinzas de punta fina para agarrar a carracha tan preto da superficie da pel como sexa posible, sen facer presión sobre o corpo da carracha. Logo, tirar cara a arriba cunha presión uniforme e constante, sen esmagar o insecto nin torcelo, “xa que isto pode provocar que se rompan partes da boca e que queden na pel”. Despois de retirar a carracha, limpar ben a área da picadura e as mans con alcohol ou con auga e xabón. No caso de que aparezan síntomas como vultos na pel, febre, dor de cabeza, vómitos ou dores musculares é preciso consultar a un médico. Estes protocolos de actuación do Sergas e o Ministerio de Sanidade distribuiranse nos centros de ensino, centros de día, asociación e outros colectivos.

Controis para evitar a proliferación do mosquito tigre

O Concello lanza unha serie de recomendacións para evitar a proliferación do mosquito tigre: un insecto pequeno de entre 5 e 7 milímetros, cor negra, con raias brancas no abdome e patas. Desde o departamento de Sanidade e Medio Ambiente informan que se activa en época de calor, e que pode transmitir enfermidades virais como o dengue, zika, ou febre amarela. Para minimizar os riscos é importante retirar do exterior todos os obxectos que poidan acumular auga (pratos de testos, cinceiros, cubos, xoguetes) ou darlles a volta para evitar que se enchan con auga de choiva. É necesario seguir estas indicacións en a patios, xardíns, parcelas ou terrazas. O mosquito tigre ten gran capacidade de reproducirse na contorna urbana. Un 80% das zonas de cría están en vivendas. A femia pon os ovos en lugares que, aínda que estean secos, son susceptibles de encharcarse ou en calquera pequeno recipiente que conteña auga. A edil lembra que a día de hoxe a presenza deste insecto na comarca non é preocupante porque os exemplares detectados son poucos, pero que “o mellor remedio é previr que se reproduza”. Por ese motivo traslada este aviso a cidadanía, unha advertencia que está xa presente nos cemiterios municipais para que se teña en conta esta medida de prevención que busca beneficiar á veciñanza.