Xuventude

A exposición «Mafada e os dereitos da Infancia», inaugurada en Redondela co gallo do Día Mundial da Infancia, poderá visitarse desde este luns na sala de exposicións do Multiúsos de Chapela.

Resultado da colaboración entre as Bibliotecas Municipais e mais a Concellería de Infancia, coa inestimable participación dos centros de ensino de Primaria e mais de Secundaria do noso Concello, constitúe un xeito de homenaxear ao inesquecible personaxe de Mafalda polo seu 60 aniversario.

Un personaxe que, aínda que sesentona, segue a ser unha nena, e que podería convivir coa rapazada destes tempos, xa que Mafalda, reivindicativa, comprometida, feminista, defensora do medio ambiente…, sempre foi unha adiantada ao seu tempo.

Aínda que o seu aniversario foi en setembro, en Redondela fixémolo coincidir co Día Mundial da Infancia, e mais coa celebración do Pleno Infantil que celebrou o noso Concello para ese día.

Un xeito de lembrar o valor que Mafalda tiña para reivindicar os dereitos dos nenos e das nenas; e así, dándolle voz aos dereitos da Infancia, foi como o alumnado dos centros de ensino nos representou a Mafalda.

Para nós foi moi gratificante comprobar que moitos nenos e nenas desta xeración descubriron a este personaxe grazas a actividade. A eles e mais a todos e todas vós, convidámosvos a coñecela máis a través dos libros coas súas viñetas que temos nas nosas bibliotecas.

Poderedes ver estas orixinais propostas realizadas pola rapazada redondelá na sala de exposicións do Multiúsos de Chapela. Desde o 16 de decembro ata o 16 de xaneiro. Eso sí, tede en conta que durante as semanas de Nadal o Multiúsos (excepto o 27 de decembro) estará pechado.

O auditorio do Xunqueira acolleu onte a celebración dun pleno infantil no que participaron alumnos e alumnas dos centros de primaria e secundaria do municipio xunto coa alcaldesa Digna Rivas, a concelleira de Infancia, Iria Vilaboa, e a representante de Unicef, Marta Andrade.

Acompañados dous seus mestres e mestras, no pleno participou rapazada dos CEIP Alexandre Bóveda (Dafne e Lía), Cedeira (Abel e Raquel), Quintela (Enzo e Vera), Igrexa, Porto Cabeiro (Teo e Enzo), Reboreda (Eva e Enzo), CEP Santa Mariña (Carmela, Valentina e Mateo), Colexio Vigo (Marco e Sofía) e os IES Illa de San Simón (Mara e Antón), Pedro Floriani (Abel e Julia) e Mendiño (Carla, Antía, Leire e Bruno). A sesión plenaria deste Consello Municipal de Infancia e Adolescencia coincide coa celebración onte, 20 de novembro, do Día Internacional da Infancia. O Consello Municipal de Infancia e Adolescencia é un órgano participativo e de carácter consultivo que serve de representación do conxunto da Infancia e a Adolescencia dentro do municipio, e que se artella favorecendo a colaboración dos máis novos cos adultos na elaboración das políticas municipais, tendo en conta o punto de vista da rapazada.

A alcaldesa, Digna Rivas, que presidiu o pleno, salientou a importancia desta sesión plenaria “xa que os propios nenos e nenas, de primeira man, poden expoñer as súas necesidades, reivindicacións e inquedanzas”.

“Coñecemos os nosos dereitos, actuamos para protexelos” era o lema deste ano, e a mocidade expresou as súas demandas e inquedanzas neste sentido. Falaron da necesidade de apostar por un ensino e unha sanidade públicos e de calidade, “onde non se recorte persoal para que a atención á infancia sexa a axeitada”. Tamén demandaron “máis parques adaptados para persoas con diversidade funcional” e tamén melloras nos patios dos colexios. Mellorar a seguridade viaria nas entradas e saídas dos centros de ensino foi outra das súas reivindicacións. A concellería de Infancia trasladará todas estas peticións ás administracións competentes. A alcaldesa, Digna Rivas, comprometeuse a estudar as peticións que son competencia do Concello e darlle resposta. Tamén aclarou que se invisten moitos cartos públicos cada ano en melloras de parques e outros espazos públicos “que por culpa do vandalismo estráganse ao pouco tempo”.

-Os participantes fan kaiak, paddle surf, observación de estrelas, xogos de orientación, supervivencia na natureza, unha acampada nocturna e actividades de educación ambiental, entre outras propostas.

– Os participantes da segunda quenda recibiron a visita da alcaldesa, Digna Rivas, e a concelleira de Infancia, Pilar Martínez, que puxeron en valor estas actividades coas que os máis novos practican deportes náuticos ao tempo que reciben formación ambiental dun xeito lúdico.

Rapaces e rapazas de entre 10 e 18 anos están a participar no campamento de aventuras “Coñece e desfruta Redondela 2024”, no que practican deportes como o kaiak e o paddle surf, xogos na praia e outras actividades lúdicas. A alcaldesa de Redondela, Digna Rivas, visitou onte a un grupo de participantes deste campamento xunto á concelleira de Infancia, Pilar Martínez, e puxo en valor este programa, “co que os máis novos practican deportes náuticos ao tempo que reciben formación ambiental dun xeito lúdico”. A principal novidade deste ano é a acampada nocturna, que inclúe xogos de orientación e a observación de estrelas. No campamento fan tamén actividades de “bushcraft”, xogos de supervivencia nos que os participantes aprenden a construír refuxios con materiais da natureza, e crean utensilios como cordas ou cestas con fibras naturais. Pilar Martínez, responsable tamén da área de Medio Ambiente, explica que ademais de divertirse, a rapazada “pode coñecer mellor o patrimonio natural das nosas praias e aprender a coidalo”.

Fin de semana con RedondelArte

Outra das propostas da concellería de Infancia de Redondela para este verán é o campamento RedondelArte, unha fin de semana de inmersión artística que se celebrará do 20 ao 21 de xullo. A actividade está dirixida á rapazada de 6 a 18 anos con obradoiros de artes plásticas, danza, música, construción de instrumentos e deportes urbanos, entre outras actividades. Trátase dunha proposta nova dentro da programación de verán que inclúe pensión completa e pernocta. A concelleira Pilar Martínez explica que o obxectivo é “xuntar todas as disciplinas artísticas que se imparten en Redondela para que nenos, nenas e mocidade poidan coñecelas e probar distintas actividades durante toda a fin de semana”.

As xornadas comezarán o sábado día 20 ás 9.30 da mañá no pavillón da Marisma, con actividades ao longo de todo o día. Na velada do sábado haberá unha exhibición de deportes urbanos no skate park e participarán na elaboración dun mural. Os participantes pasarán a noite no pavillón e o domingo realizarán diferentes obradoiros para rematar co fin de festa na Praza da Casa da Torre. As actividades serán impartidas polas escolas Ao Teu Ritmo, Mimarte Taller Creativo e a escola de danza CDPI.

A proposta de RedondelArte, subvencionada polo Concello, ten un copago de 45 euros por participante, 40 no caso do segundo irmán. O prezo inclúe todas as actividades da fin de semana, materiais, monitores cualificados, pernocta e pensión completa. O prazo de inscrición está aberto ata o 10 xullo. Máis información en redondelarte2024@gmail.com. Reservas no propio Concello de Redondela, no teléfono 986 400 300 ou no enderezo electrónico concello@redondela.gal.