Bibliotecas

– A Alameda Castelao acolle a IV edición do certame “Espallar Tinta”, no que participan preto de 700 escolares de Infantil de Primaria dunha ducia de colexios. “A volta ao mundo”, a literatura de Jules Verne ou a poesía de Rosalía de Castro foron algúns dos temas que amosaron ao público.

– A alcaldesa, Digna Rivas, agradeceu a todos os centros a súa participación nesta feira na que o propio alumnado dá a coñecer as súas producións escritas en lingua galega. Para a alcaldesa é moi importante “facilitar espazos ao aire libre e abertos ao público onde os nenos e nenas poidan expresarse e amosar o seu traballo”. A rapazada puido gozar tamén do espectáculo do Show de Fifo.

“Espallar Tinta” chega á súa IV edición co obxectivo cumprido: “promover a dinamización da escritura e a literatura en galego na infancia”. Preto de 700 nenos e nenas dos diferentes centros de Educación Primaria e Infantil de Redondela danse cita na Alameda Castelao durante dous días para participar nesta fermosa iniciativa. Onte participou o alumnado dos colexios de Cedeira, Ventosela, Alexandre Bóveda, EEI Marisma, Quintela e Colexio Vigo. Como novidade, nesta edición participou como convidado o CEIP Doutor Suárez, de Fornelos de Montes. Hoxe estarán os centros Igrexa-Chapela, Santa Mariña, Outeiro das Penas, San Pedro de Cesantes, Reboreda, e repiten Cedeira e Alexandre Bóveda. Como cada ano os colexios presentan orixinais traballos. Puidemos coñecer diferentes países coa “Volta ao mundo en 80 días”, e outras novelas de Jules Verne, así como poesía de Rosalía de Castro, entre outras propostas. Como en edicións anteriores tamén participaron as Bibliotecas Municipais de Redondela e Chapela.

A alcaldesa, Digna Rivas, explica que “Espallar Tinta” é unha feira na que o propio alumnado dá a coñecer as súas producións escritas. Nestas dúas xornadas a infancia é a protagonista. Para a alcaldesa é moi importante “facilitar espazos ao aire libre e abertos ao público onde os nenos e nenas poidan expresarse con seguridade e amosar o seu traballo”. O concelleiro de Ensino, Alberto Álvarez, salientou tamén a importancia de actividades como esta “para favorecer a convivencia entre o alumnado e profesorado dos diferentes centros, e poder compartir proxectos e experiencias”. E para facer deste “Espallar Tinta” unha festa completa, a rapazada puido gozar do espectáculo “O Show de Fifo”, de Troula Animación, con maxia, xogos e moito humor. Todos os participantes recibiron tamén por parte do Concello un fermoso caderno serigrafiado coa mascota do evento.

“Espallar Tinta” é unha actividade financiada polo Concello de Redondela que partiu da iniciativa do CEIP Cedeira. A alcaldesa agradeceu o gran traballo deste centro, da súa ANPA, e da profesora Jessica Rodriguez Piñeiro “na organización dun evento desta magnitude”.

O 17 de marzo celébrase o Día do Cómic no Calendario do Libro e a Lectura.
Para festexalo, as Bibliotecas Municipais de Redondela facemos “Viñetas cruzadas”: un intercambio de maletas de cómics para público xuvenil e adulto, entre as nosas sedes de Redondela e mais de Chapela.

Un xeito de facilitar aos nosos usuarios o achegamento á colección municipal de cómic.

Podedes gozar destas maletas de intercambio ata o 17 de abril.