Cultura

A concelleira Rita Pérez Táboas e a artista convidada Carolina Smith.

– O Concello de Redondela celebra este sábado 22 a súa tradicional Gala Drag dentro do 27º Entroido de Verán, unha gran festa do respecto e a liberdade que reparte 2.000 euros en premios. Organizado en colaboración coa concellaría de Igualdade, o evento busca visibilizar a diversidade. O presentador e showman Carlos Veleiro será o mestre de cerimonias desta gala, que contará con Carolina Smith como artista convidada.

O Concello de Redondela celebrará o vindeiro sábado día 22 a tradicional Gala Drag no marco da 27ª edición do Entroido de Verán. A cita é no recinto do campo da feira ás 21.30 horas. O presentador, showman e monologuista Carlos Veleiro será o mestre de cerimonias desta gala, que contará con Carolina Smith como artista convidada. No concurso repartiranse 2.000 euros en premios, no que o xurado terá en conta a orixinalidade, creatividade e elaboración das fantasías.

A concelleira de Cultura e Turismo, Rita Pérez, sinala que este evento é unha parte moi destacada do Entroido de Verán, que é “espectáculo e diversión pero tamén compromiso coa igualdade e a diversidade”. Pérez Táboas afirma que a Gala Drag “é o mellor reflexo do noso orgullo e da nosa aposta firme pola inclusión”, e conta coa colaboración fundamental da concellaría de Igualdade. “Traballando de xeito conxunto, Cultura e Igualdade demostramos edición tras edición que a cultura e a festa son as mellores ferramentas para visibilizar a diversidade e seguir derrubando barreiras na nosa sociedade”.

Desde o Concello faise un chamamento ao público para gozar do gran talento dos participantes nesta Gala Drag que será “unha gran festa do respecto e a liberdade.”

As actividades no recinto comezarán xa ás 20.00 horas coas sesións dos Djs Sara Gonzálezz e Borja Rúa. Ao remate da Gala Drag a música en directo collerá o relevo co concerto dos galegos Monoulious DOP (de 23:00 a 0:30 horas) e a grande actuación internacional do grupo arxentino Ráfaga, que fará bailar ao público cos seus éxitos dende as 0:30 ata as 2:15 horas da madrugada. O peche oficial da xornada correrá a cargo dos DJs Kike Varela e Rodri Vegas, cunha sesión final prevista ata as 4:00 horas.

– A mostra nace como continuación da primeira edición de agosto de 2023 e inclúe novas reproducións de edificios da vila. Son máis de 100 maquetas que poderán visitarse no Multiusos da Xunqueira do 13 de agosto ao 15 de setembro.

O Concello de Redondela acolle a segunda edición da exposición de maquetas “A nosa pequena vila”, unha mostra artística realizada polo veciño e creador Gene Muíños Reboredo. Esta nova exposición dá continuidade á primeira edición celebrada con grande éxito en agosto de 2023, ampliando agora a colección con pezas inéditas e novas recreacións de edificios emblemáticos do municipio. Son en total máis de 100 maquetas que recollen a vila de Redondela.

A exposición abrirá as súas portas o vindeiro xoves 13 de agosto ás 20.00 horas no Multiusos da Xunqueira, onde permanecerá ata o 15 de setembro. A través desta colección ampliada de pezas a escala (1,5:100), os visitantes poderán realizar un percorrido visual máis completo polas construcións senlleiras do municipio. Os edificios están plasmados con gran realismo, rigor e precisión artesanal e as maquetas contan con todo luxo de detalles, incluído o mobiliario urbano ou esculturas.

A alcaldesa, Digna Rivas, destacou o valor desta cita cultural e o orgullo que supón para o municipio contar co talento de Gene Muíños: “Despois do grandísimo interese que espertou a primeira mostra en 2023, é un privilexio presentar esta ampliación. O traballo de Gene Muíños non é só unha demostración de paciencia e precisión artesanal, senón unha homenaxe de valor incalculable á nosa identidade e á riqueza arquitectónica de Redondela”. Rivas engadiu que “con esta segunda edición, veciños e visitantes teñen unha oportunidade única para redescubrir a nosa vila dende unha perspectiva nova e minuciosa, que protexe e difunde a nosa memoria histórica”.

Dende o Goberno local convídase a toda a veciñanza e visitantes a achegarse ao Multiusos para descubrir estas novas incorporacións, poñer en valor a memoria de Redondela e apoiar o talento dos creadores locais.

Digna Rivas e Rita Pérez presentaron o cartel deste Entroido co DJ redondelán Rodri Vegas

– A mítica banda arxentina Ráfaga porá o ritmo da noite xunto ao talento galego de Monoulious Dop e as sesións de DJ de Olalla Gonzalezz, Borja Rua, Kike Varela e Rodri Vegas que se prolongarán ata a madrugada .

– A programación infantil incluirá inchables con auga, espectáculos, xincana e festa da escuma. A alcaldesa de Redondela, Digna Rivas, destaca que a intención do Concello redondelán é ofrecer unha programación ampla e variada para todos os públicos “por iso os nenos e nenas teñen os seus propios espazos con actividades específicas”.

O Concello de Redondela desvelou a programación detallada para a vixésimo sétima edición do seu aclamado Entroido de Verán, que se celebrará o sábado 22 de agosto. O Goberno local deseñou unha xornada que combina propostas para o público infantil e familiar durante a tarde con potentes actuacións musicais de gran formato que se prolongarán ata a madrugada. A alcaldesa, Digna Rivas, destaca que a intención do Concello redondelán é ofrecer unha programación “que teña en conta tanto ao público infantil e familiar como á mocidade e público adulto, por iso os nenos e nenas teñen o seu propio espazo con actividades específicas e actuacións pensadas para eles”. Desde as concellarías de Turismo e Cultura, que dirixe Rita Pérez Táboas, faise unha aposta polos grupos locais e galegos.

Animación infantil dende as 18:00 horas

Os máis cativos serán os encargados de abrir a festa a partir das 18:00 horas. A programación familiar distribuirase en varios puntos da vila: a Praza de Ponteareas acollerá unha xincana con inchables, a Pista da Xunqueira contará con inchables con auga e, máis tarde, ás 21:00 horas, a tradicional Festa da Escuma. A maiores, a Praza da Torre sumará o espectáculo musical A bailar, da compañía Animar-T, programado para as 19:30 horas.

Gran despregue musical no Campo da Feira

O epicentro da música nocturna estará situado no Campo da Feira. O ambiente quentará motores de 20:00 a 21:30 horas coas sesións de DJ de Olalla Gonzalezz e Borja Rua. De seguido, ás 21:30 horas, dará comezo a Gala Drag e, ao remate, a música en directo collerá o relevo co concerto dos galegos Monoulious DOP (de 23:00 a 0:30 horas) e a grande actuación internacional do grupo arxentino Ráfaga, que fará bailar ao público cos seus éxitos de cumbia dende as 0:30 ata as 2:15 horas da madrugada. O peche oficial da xornada correrá a cargo dos DJs Kike Varela e Rodri Vegas, cunha sesión final prevista ata as 4:00 horas.

Seguridade, sostibilidade e transporte reforzado

Co fin de garantir o correcto desenvolvemento do evento, o Concello informou de que queda estritamente prohibido acceder con recipientes de cristal aos espazos oficiais onde se desenvolven as actividades. Tamén se habilitará un Punto Violeta e Arcoiris na contorna e lémbrase que todo o recinto estará protexido como un espazo libre de violencia machista, co teléfono 112 dispoñible para calquera emerxencia.

Para facilitar unha mobilidade segura e evitar o uso do coche privado, a empresa de transporte poñen en marcha un servizo especial de autobuses de ida e volta que conectarán Redondela con Vigo, Pontevedra e O Porriño. Os autobuses sairán con destino a Redondela desde os diferentes puntos a partir das 18.00 horas, e haberá transporte de volta até as 06.00 horas.

Dende o Concello de Redondela faise un chamamento á veciñanza e aos miles de visitantes que se agardan ese día para desfrutar da xornada cun espírito retranqueiro, orixinalidade nos disfraces e, por riba de todo, respecto e moderación.