Desenvolvimiento Local - Empleo (AEDL)

O Concelleiro de Emprego e Medio Ambiente, Alberto Álvarez, supervisa os traballos no paseo do Pexegueiro.

– Os alumnos-traballadores de carpintaría e xardinería actúan en paseos, rotondas, espazos culturais e xacementos arqueolóxicos en diferentes parroquias. Entre as accións destacan a renovación de mobiliario no río Pexegueiro e a Telleira, a nova tarima do auditorio da Xunqueira e unha horta ecolóxica solidaria.

– Con estas actuacións o Concello logra un dobre obxectivo: os espazos urbanos e naturais lucen renovados para o beneficio directo da veciñanza, mentres o alumnado adquire unha experiencia práctica en escenarios reais de traballo.

O Concello de Redondela avanza na mellora dos seus espazos públicos grazas ao traballo dos participantes do Obradoiro de Emprego ‘Redondela Natureza’. Este programa non só ofrece formación estratéxica, senón que funciona como un motor de renovación urbana e ambiental. Os alumnos-traballadores executan obras de utilidade pública tanto no centro urbano como nas diferentes parroquias.

Carpintaría: renovación de mobiliario e infraestruturas.

O módulo de carpintaría centra as intervencións na mellora do equipamento público. Esta semana comezaron os traballos de acondicionamento no paseo do río Pexegueiro e no que bordea o Monte da Telleira. Primeiro realízase a limpeza das varandas, para posteriormente proceder á súa restauración e á fabricación de novo mobiliario público con bancos, papeleiras e paneis informativos. Outra das tarefas na que traballan actualmente é na instalación de nova tarima no escenario do auditorio da Xunqueira. O plan de traballo inclúe tamén a fabricación e instalación dun portón de madeira na emblemática torre de Pousadouro.

Forestal e Xardinería: posta en valor do contorno natural.

Os participantes da especialidade forestal e de xardinería realizan a limpeza na contorna dos xacementos arqueolóxicos de Monte Penide/Mirallo, ademais de actuacións na Coutada (Quintela) e Veiga da Moucheira (Reboreda). Tamén se encargarán do coidado e embelecemento das rotondas de acceso na N-552 (Cedeira e Rande), na EN555 (Vilar), na PO250 (Reboreda), en Vilavella e en Ernestina Otero.

Un proxecto solidario e sostible en Pousadouro.

A actividade de ‘Redondela Natureza’ inclúe tamén unha vertente social directa. O alumnado xestiona unha explotación de agricultura ecolóxica na horta de Pousadouro, cuxos produtos vexetais se destinan integramente a doazóns para a ONGs locais. Así mesmo, o viveiro de Pousadouro produce plantas hortícolas, forestais e ornamentais que o propio Concello empregará de xeito autónomo no mantemento futuro das súas áreas verdes.

Con este conxunto de actuacións, o Goberno local de Redondela logra un dobre obxectivo: os espazos urbanos, naturais e patrimoniais lucen renovados e mellorados para o beneficio directo da veciñanza, mentres o alumnado adquire unha experiencia práctica directa en escenarios reais de traballo.

Novo obradoiro de Albanelería e Pintura “Talento Mozo de Redondela”.

O novo obradoiro de emprego comezará en setembro e o alumnado formarase nas especialidades de Pintura e Albanelería, dous sectores con gran demanda de profesionais. Para formar parte do proceso de selección, a mocidade interesada debe ter cumpridos os 18 anos e non superar os 30. É imprescindible estar inscrito como demandante de emprego no Servizo Público de Emprego de Galicia (SEPE) e no ficheiro do Sistema Nacional de Garantía Xuvenil en Galicia.

Alumnado dun obradoiro de emprego anterior na especialidade de carpinteiría.

– O proxecto “Talento Mozo de Redondela” iniciará a súa actividade en setembro cunha duración de 12 meses. O alumnado formarase nas especialidades de Pintura e Albanelería, dous sectores con gran demanda de profesionais. Os participantes recibirán un contrato de traballo remunerado co Salario Mínimo Interprofesional .

– A alcaldesa, Digna Rivas, destacou a importancia estratéxica deste proxecto para o municipio “dándolle á xente nova as ferramentas para construír un futuro profesional”. Os beneficios son dobres porque “ao tempo que se forman cun soldo digno, poderán mellorar edificios públicos e rúas que emprega a veciñanza de Redondela e Chapela”.

O Concello de Redondela reafirma o seu compromiso coa inserción laboral da mocidade do municipio a través da posta en marcha do novo Programa de Formación-Emprego Talento Mozo de Redondela.

O obradoiro terá cunha duración de 12 meses e iniciará a súa actividade en setembro con formación teórica e práctica nas especialidades de “Pintura decorativa en construción” e “Albanelería”. O obxectivo principal é mellorar a empregabilidade dun total de 16 alumnos e alumnas (8 por cada especialidade formativa) mediante a adquisición de certificados de profesionalidade. As persoas seleccionadas asinarán un contrato de traballo e percibirán unha remuneración equivalente ao Salario Mínimo Interprofesional (SMI) vixente.

A alcaldesa, Digna Rivas, destacou a importancia estratéxica deste proxecto para o municipio: “Este programa é unha gran oportunidade para que mozos e mozas constrúan o seu futuro profesional”. A rexedora destaca que os obradoiros teñen un dobre beneficio porque “non só formamos á xuventude cun soldo digno desde o primeiro día, senón que tamén investimos na mellora do noso patrimonio e dos servizos públicos que desfruta toda a veciñanza de Redondela e Chapela”.

O concelleiro de Emprego, Alberto Álvarez, subliñou o impacto directo na inserción laboral que supón esta modalidade: “Buscamos un modelo de aprendizaxe práctico e real”. O alumnado adquire a experiencia real que esixe o mercado laboral en sectores con moita demanda como son a construción e as reformas”.

Na modalidade de Pintura impartiranse os certificados de profesionalidade de Pintura decorativa en construción e Operacións auxiliares de revestimentos continuos en construción. No caso de Albanelería o alumnado formarase en catro módulos, incluíndo Operacións auxiliares de albanelería de fábricas e cubertas, Operacións auxiliares de revestimentos continuos en construción, Operacións básicas de revestimentos lixeiros e o módulo de Tratamentos auxiliares en revestimentos con pezas ríxidas .

Melloras en edificios públicos e patrimonio local

O alumnado aplicará os coñecementos adquiridos en espazos públicos do Concello. Na especialidade de Pintura realizarán traballos de reparación e diversos tratamentos na Casa da Cultura, a Casa do Concello, os Edificios Multiusos da Xunqueira e de Chapela, e no Centro de Formación A Marisma.

Pola súa banda, o módulo de Albanelería centrarase en reformas estruturais e colocación de pavimentos na Casa da Cultura, o Conservatorio de Música, no local da antiga estación de tren de Chapela e na antiga escola de Saxamonde. Tamén actuarán en rúas do casco antigo como Padre Crespo, Isidoro Queimaliños, Reveriano Soutullo, Meixón frío ou Praza da Constitución, entre outras.

Requisitos de participación e inscrición

Para formar parte do proceso de selección, a mocidade interesada debe ter cumpridos os 18 anos e non superar os 30. É imprescindible estar inscrito como demandante de emprego no Servizo Público de Emprego de Galicia (SEPE) e no ficheiro do Sistema Nacional de Garantía Xuvenil en Galicia. Para a especialidade de Albanelería non se require ningunha previa. No caso de Pintura decorativa requírese a formación regulada mínima que permita o acceso a certificados de profesionalidade de nivel 2.

Todas as persoas que cumpran os requisitos e desexen participar deberán formalizar a súa solicitude o antes posible acudindo directamente ás oficinas do Servizo Público de Emprego de Galicia de Redondela ou de Chapela.

O obradoiro foi concedido pola Consellería de Emprego, Comercio e Emigración da Xunta de Galicia, cunha subvención que ascende a 483.995,36 €, e complétase cunha achega municipal de 18.400 €.

– A alcaldesa, Digna Rivas, destaca que o venres 31 de xullo a vila será “un gran escenario ao aire libre co mellor ambiente cultural e festivo”. Rúas e prazas acollerán un completo programa gratuíto con ilusionismo, teatro, acrobacias, música urbana e xogos tradicionais. O Mago Orbit, Lg1do, Pablo Méndez Performance e Tanxarina serán algúns dos protagonistas.

– A xornada complétase un ano máis coa proposta do comercio local. Máis de 40 establecementos abrirán ata a media noite con rebaixas de ata o 70 %, música en directo, sorteos e sorpresas.

O Concello de Redondela presentou a programación do XXVII Festival ‘Artistas de Rúa’, unha gran cita cultural que encherá de maxia os espazos públicos da vila o vindeiro venres 31 de xullo. Esta nova edición compartirá protagonismo coa ‘Aloha! Shopping Night’, unha iniciativa na que 44 establecementos comerciais e hostaleiros abrirán en horario estendido para ofrecer unha experiencia única de lecer e compras. A alcaldesa de Redondela, Digna Rivas, amosou o seu orgullo por conseguir unificar un ano máis dúas citas tan potentes no calendario local. “Queremos que Redondela sexa ese venres un gran escenario ao aire libre, cheo de vida e ilusión para as familias, pero tamén un motor de dinamización económica”, sinalou a rexedora. Rivas fixo fincapé na importancia de apoiar ao tecido empresarial da vila: “A nosa hostalaría e o comercio de proximidade son os que dan vida a Redondela todos os días do ano; con esta xornada compartida de actividades creamos o escaparate perfecto para que a xente de fóra nos visite, consuma no noso comercio e descubra todo o que podemos ofrecer nun ambiente inmellorable”.

Gran despregue do XXVII Festival Artistas de Rúa

A programación artística arrancará pola tarde e estenderase de xeito ininterrompido ata a media noite con propostas de balde:

• 18:30 h | O Xogar de Breogán (Alameda de Castelao): Xogos de madeira de temática castrexa e sección de autómatas para conectar coas raíces e a historia celta.

• 19:15 h | Tanxarina: Titiricircus (Rúa Salgueiral): Un emotivo e participativo espectáculo de marionetas de fío que rende homenaxe ás glorias do vello circo.

• 20:15 h | Pasarrúas: O Minúsculo (Inicio na Praza de Ribadavia): Gran desfile multidisciplinar protagonizado por unha impactante marioneta de fío de cinco metros de altura.

• 21:30 h | Pablo Méndez Performances: Quimera (Praza do Concello): Espectáculo visual e acrobático inspirado na mitoloxía e na maxia da natureza.

• 22:30 h | Lg1do, Artista Urbano (Pista da Xunqueira): Concerto en directo dunha das grandes promesas musicais de Galicia, fusionando trap e reguetón en galego e español.

• 23:30 h | Mago Orbit: Acero (Praza da Torre): Broche de ouro cun show de ilusionismo de alto impacto e luces ao máis puro estilo das Vegas.

‘Aloha! Shopping Night’: Compras, descontos e animación

Como o complemento perfecto á oferta cultural, desde as 19:00 horas o tecido comercial sumará a súa propia animación. Máis de 40 establecementos ofrecerán interesantes descontos de ata o 70 % con promocións, música e sorpresas para os clientes. A Praza da Constitución acollerá postos especiais na rúa e varios locais de hostalaría ofrecerán propostas especiais para cear.

Digna Rivas pechou a presentación convidando a toda a veciñanza e dos concellos da comarca a achegarse a Redondela o vindeiro 31 de xullo “para vivir unha noite máxica de cultura, diversión, ocio e compras que non vai deixar a ninguén indiferente”.