Medio Ambiente

– Ao longo do mes de agosto celébranse roteiros e visitas guiadas gratuítas por diferentes parroquias do municipio para dar a coñecer o patrimonio histórico e natural de Redondela. Son propostas para todos os públicos con guías profesionais que fan máis enriquecedora a experiencia.

– A “Orientaventura Cultural” en Vilar de Infesta, unha ruta botánica pola vila ou os muíños do río Pexegueiro son algunhas das novidades. Os concelleiros Rita Pérez e Roberto Villar salientan o traballo conxunto para ofrecer un lecer “educativo, integrador e respectuoso coa contorna”. Inscricións na Oficina Municipal de Turismo.

O Concello de Redondela presenta a programación dos Roteiros Ambientais e Culturais que se celebrarán en agosto. Tras o éxito acadado en edicións anteriores, no vindeiro mes as propostas amplíanse con novos itinerarios e propostas para o público familiar.

Vilar de Infesta acollerá a actividade “Orientaventura Cultural” (martes 25), unha proposta lúdica dirixida a familias e mozos de entre 10 e 15 anos. O calendario tamén estrea a ruta “Usos das Plantas da Vila” (domingo 9), para descubrir as aplicacións tradicionais da flora local, xunto con interesantes percorridos como “As Pedras de Ventosela” (domingo 9), “Terras de Saxamonde e Vilar de Infesta” (domingo 23) e o roteiro polos muíños do río Pexegueiro (sábado 29).

A concelleira de Cultura e Turismo, Rita Pérez, subliñou o compoñente pedagóxico e de identidade destas propostas: “Queremos que a veciñanza e os visitantes se convertan en dinamizadores do noso propio relato histórico. Coa Orientaventura e os novos paseos urbanos abrimos o abano para que a mocidade e as familias descubran o noso patrimonio cultural, que está vivo e accesible para todos”.

Pola súa banda, o concelleiro de Infraestruturas e Sostibilidade, Roberto Villar, fixo fincapé no valor ecolóxico do programa: “Os trazados por Ventosela ou Saxamonde demostran o noso compromiso coa divulgación ambiental e a posta en valor do noso interior. Deseñamos estes dezaseis roteiros para gozar da nosa enorme biodiversidade sen deixar pegada, promovendo un turismo sostible que coida os nosos ríos, montes e o litoral”.

Calendario completo de actividades (Agosto 2026):

• Sábado 1: Paseo nocturno polo río Maceiras (21:00 – 23:00 h).

• Domingo 2: Ruta ambiental “A Intermareal de Cesantes” (10:00 – 13:00 h).

• Martes 4: Visita guiada ao Cemiterio dos Eidos (19:00 – 20:00 h).

• Domingo 9: Ruta ambiental “As Pedras de Ventosela” (09:30 – 13:00 h).

• Domingo 9: Ruta ambiental “Usos das Plantas da Vila” (19:00 – 21:00 h).

• Martes 11: Visita guiada “As Mulleres da Vila: Da Historia á Memoria” (19:00 – 20:00 h).

• Martes 18: Visita guiada ao Cemiterio dos Eidos (19:00 – 20:00 h).

• Venres 21: Kayak turístico á Portela (11:00 – 12:30 h, 20 €).

• Venres 21: Paseo nocturno “Observación Xeográfica, Histórica e Natural da Ría de Vigo” no Miradoiro do Outeiro Grande (20:00 – 22:30 h).

• Domingo 23: Ruta ambiental “Terras de Saxamonde e Vilar de Infesta” (10:00 – 13:00 h).

• Martes 25: Visita guiada “As Mulleres da Vila: Da Historia á Memoria” (19:00 – 20:00 h).

• Martes 25: “Orientaventura Cultural de Vilar de Infesta” (Familias e rapazada de 10 a 15 anos, 19:00 – 21:00 h).

• Sábado 29: Ruta ambiental longa “O Río Pexegueiro” (09:00 – 13:00 h).

• Sábado 29: Visita guiada teatralizada no Museo Meirande (Dous pases: 16:30 e 18:00 h).

• Domingo 30: Ruta ambiental “O Litoral de Soutoxuste” (10:00 – 13:00 h).

• Domingo 30: Kayak na Enseada de San Simón (10:30 – 13:00 h, 20 €).

Inscricións e reservas

A maioría das propostas son gratuítas, fóra das saídas en kayak que teñen un custo de 20 € por persoa. Para garantir a calidade de cada percorrido, todas as actividades teñen prazas limitadas con reserva previa na oficina de Turismo:

• Teléfono de contacto: 986 401 713

• Correo electrónico: turismo@redondela.gal

O concelleiro de Medio Ambiente, Alberto Álvarez, xunto a un dos depósitos ilegais de cascallo na Formiga, Cedeira.

– As inspeccións confirman que os residuos proceden de actividades de construción e reformas. Os vertidos rexistráronse en Cedeira, Chapela e Redondela. Entre os restos atópanse cascallos, electrodomésticos, mobles e material de obra que deberían trasladarse a plantas de reciclaxe. Estes vertidos supoñen unha infracción e a ordenanza municipal contempla multas de ata 3.000 euros para as máis graves.

– O concelleiro de Medio Ambiente, Alberto Álvarez, sinala que desde o Concello son conscientes de que existen máis puntos de vertidos e fai un chamamento á colaboración veciñal “para localizar e denunciar ás persoas responsables de facer este tipo de verteduras ilegais en espazos públicos”.

O Concello de Redondela ten en marcha varias investigacións por vertidos incontrolados na vía pública en diferentes puntos. O concelleiro de Medio Ambiente, Alberto Álvarez, explica que pola tipoloxía e o volume dos materiais atopados, a orixe destes vertidos non corresponde a particulares, senón a actividades empresariais e profesionais “que esquivaron de xeito ilegal a normativa”. Entre os restos localizados destacan cascallos de reformas e construción, ventás e tubos, así como mobles e electrodomésticos de liña branca. Este material debe levarse a plantas de reciclaxe a través dun xestor autorizado. Os últimos puntos de vertidos localízanse na zona da Formiga e na N-552, en Cedeira, na zona de Pasán, en Chapela, e no camiño da Subida á Estación Vella, en Redondela.

Dende o Goberno local cualifican estes actos como “atentados ecolóxicos ” que non só danan a imaxe do municipio e o seu medio natural, senón que tamén supoñen un grave risco de contaminación. As pescudas avanzan e, nun dos catro casos analizados, a Policía de Medio Ambiente do Concello dispón de datos sobre un vehículo investigado como presunto responsable de transportar e depositar os refugallos de forma clandestina. O concelleiro de Medio Ambiente agradece a colaboración cidadá “que está a dar os seus froitos” e destaca a gran labor policial de investigación na identificación dos infractores. Álvarez sinala que no seu departamento son conscientes de que existen máis puntos de vertidos e fai un chamamento á colaboración veciñal “para localizar e denunciar ás persoas responsables de realizar vertidos ilegais en espazos públicos”.

O Concello lembra que as sancións por realizar vertidos industriais non autorizados poden alcanzar contías moi elevadas, ademais da obriga legal de restituír o terreo ao seu estado orixinal. No caso das infraccións leves a ordenanza municipal contempla multas de ata 750 euros, para as infraccións graves ata 1.500 euros, e no caso das moi graves as sancións poden chegar aos 3.000.

Residuos no paseo do Pexegueiro

A Concellería de Medio Ambiente deu traslado ao Ministerio de Transportes e ao Administrador de Infraestruturas Ferroviarias ( Adif ) dos residuos atopados nun tramo do paseo do río Pexegueiro, en Cesantes. Estes organismos son os propietarios dos terreos, na beira da estrada nacional e a liña de tren. Recentemente realizaron traballos de tala e roza de maleza na zona, o que deixou á vista gran cantidade de lixo.

Servizo de recollida de residuos voluminosos para particulares

Para o depósito de residuos voluminosos, mobles, colchóns, electrodomésticos, etc. existe un servizo de recollida a domicilio sinxelo e gratuíto para os veciños e veciñas particulares. Tan só é preciso contactar con Urbaser no teléfono 986.388.111, de 9 a 14 horas, onde os informarán do día e lugar para depositar os residuos. No caso de empresas a normativa autonómica establece que deben retirar os seus residuos a través de xestores autorizados.

– Redondela pon en marcha medidas para restrinxir o consumo de auga potable nos servizos onde non sexa imprescindible. As duchas e lavapés dos areais do municipio quedan fóra de servizo, o baldeo de rúas con auga potable suspéndese temporalmente e redúcese ao mínimo o rego de xardíns públicos.

– Desde o Concello solicítase a colaboración de toda a cidadanía para facer un uso responsable da auga. A recomendación é evitar usos prescindibles como o lavado de vehículos con mangueira, o cheo ou recheo de piscinas privadas e o rego excesivo de hortas e xardíns particulares.

O Concello de Redondela activou un paquete de medidas urxentes de aforro de auga potable en todas as dependencias e espazos públicos do termo municipal. Esta decisión aplícase logo do comunicado oficial da empresa responsable do subministro no que se advirte que o nivel de reservas do encoro de Eiras está por do volume rexistrado nestas mesmas datas en anos anteriores.

O Goberno local quere aclarar que, a día de hoxe, o municipio non está incluído na listaxe de Concellos que a Xunta de Galicia sitúa en estado de prealerta por seca. Con todo, a alcaldesa sinala que estas restricións se adoptan “por estrita precaución e responsabilidade anticipada, co obxectivo de evitar que a situación das reservas empeore nas vindeiras semanas”, explica Digna Rivas.

As primeiras accións preventivas inclúen o peche inmediato do subministro nas duchas e lavapés de todas as praias do municipio. Así mesmo, os servizos municipais suspenderon temporalmente o baldeo de rúas co uso de auga potable e clausuraron o funcionamento das fontes ornamentais. O rego de xardíns e zonas verdes públicas queda restrinxido ao mínimo indispensable para garantir de forma exclusiva a supervivencia da vexetación.

Dada a conxuntura climática, o Concello reitera o seu chamamento á colaboración e á sensibilidade de toda a veciñanza e dos visitantes. Solicítase realizar un uso responsable e controlado da auga tamén no ámbito doméstico evitando usos prescindibles como o lavado de vehículos con mangueira, o cheo ou recheo de piscinas privadas e o rego excesivo de hortas e xardíns particulares. Rivas insiste en que “coidar as reservas actuais é o único camiño para protexer o abastecemento humano e evitar futuras limitacións máis drásticas”.