Economía

– Nunha visita á zona, o delegado del Estado na Zona Franca presentou, xunto á alcaldesa, Digna Rivas, o proxecto de execución das obras. A rehabilitación integral do inmoble da Subida á Estación responde á unha histórica demanda empresarial, combinando creación de emprego, innovación tecnolóxica e posta en valor do patrimonio

– A alcaldesa agradeceu o compromiso de Regades e a Zona Franca que dá resposta “a unha demanda histórica do tecido empresarial de Redondela”. Rivas salientou que a contorna do edificio vivirá tamén unha transformación integral cunha nova praza moderna e accesible, un ascensor urbano e un auditorio ao aire libre.

Paso adiante no proxecto do futuro Viveiro e Centro de Negocios de Redondela que impulsa a Zona Franca de Vigo na histórica edificación da Rúa Subida á Estación e a intersección coa avenida Ernestina Otero. Nunha visita á zona celebrada onte, o delegado do Estado, David Regades, acompañado da alcaldesa, Digna Rivas, confirmou que nas próximas semanas “daremos un paso definitivo coa saída a licitación das obras. Xa temos licencia do Concello e luz verde de Patrimonio polo que, se todo vai ben, poderíamos comezar os traballos a finais de ano ou principios de 2027”. Regades destacou que “non só recuperamos patrimonio cultural e histórico de Redondela, senón que implementamos un modelo de éxito probado, capaz de reter talento, fixar poboación activa e proxectar en Redondela un horizonte de competitividade e emprego cualificado, apostando polo presente e desenvolvendo futuro”.

A alcaldesa, Digna Rivas, agradeceu a Zona Franca e especialmente a David Regades, que dea resposta “a unha demanda histórica do tecido empresarial de Redondela” ao tempo que se recupera un edificio emblemático da vila para a cidadanía “como motor de futuro”.

O proxecto recupera a estrutura orixinal do edificio

O inmoble da Praza da Ponte de Lima transformarase nun equipamento vangardista cun orzamento de case 1,7 millóns de euros. A rehabilitación supón recuperar os volumes orixinais da edificación e vanse demoler engadidos que permiten recuperar o patio interior do inmoble. O “xardín interior” terá unha superficie de 60 m² como un espazo pensado para ser un punto de encontro que permite poñer en valor a estrutura orixinal “e mellorando a conectividade do edificio co espazo público”.

Regades e Rivas presentaron as principais liñas do proxecto de execución do edificio, redactado pola UTE Díaz y Díaz Arquitectos S.L.P. xunto a Castroferro Arquitectos S.C.P., que dotará á vila dun área de coworking, postos individuais e salas multiusos en pleno centro de Redondela.

Os puntos clave son os tradicionais muros de granito exteriores de 50 cm, e unha exixente restauración e mantemento das galerías de madeira orixinais. Reconfiguraranse os espazos interiores nunha volumetría de planta baixa e dous andares, cunha superficie construida total de 612,06 m², dotando a Redondela dun área de coworking e salas multiusos preparadas para albergar a persoas autónomas, emprendedores e micropymes.

No ámbito máis tecnolóxico, o futuro inmoble destaca por unha proposta de enxeñería de primeiro nivel, xa que o centro será a infraestrutura competitiva que as empresas locais necesitan para dixitalizarse e expandirse no mercado global. Os espazos contarán cun sistema avanzado de climatización para garantir a eficiencia coa máxima calidade do aire e cun consumo enerxético mínimo. Así mesmo, dispoñerá dunha rede de telecomunicacións de última xeración.

Novo espazo público e accesible de 2.300 m²

A contorna do edificio vivirá tamén unha transformación integral. O Concello está a realizar a reforma da praza da Ponte de Lima, que será un espazo público moderno e accesible. Instalarase un ascensor urbano para salvar o gran desnivel coa rúa Subida á Estación, e na parte posterior crearase un auditorio ao aire libre. Este era un lugar que se utilizaba só como zona de paso e agora, con esta obra “dámoslle vida e creamos un espazo público de 2.300 m² para uso da cidadanía”. Rivas sinala que con estas obras “resolvemos un problema histórico de accesibilidade no centro da vila e creamos un novo espazo verde para uso cultural e social”. As obras estarán rematadas antes de finais de ano, e contan cun orzamento de 870.000 euros de fondos do Plan Extra da Deputación.

– O Concello de Redondela presentou as súas alegacións á proposta de Delimitación de Espazos e Usos Portuarios do Porto de Vigo. A alcaldesa reitera o seu rexeitamento á ampliación de usos comerciais e industriais no litoral de Chapela e Rande. O Goberno local demanda ao Porto que compatibilice actividade económica coa protección ambiental e o uso público do litoral.

– Rivas reitera a necesidade de garantir a protección do patrimonio cultural, da paisaxe e da contorna natural da enseada de San Simón. O Concello reclama que neste tramo do litoral a Autoridade Portuaria avance “cara a un modelo máis equilibrado priorizando a recuperación ambiental fronte aos usos de almacenaxe e apoio loxístico”.

O Concello de Redondela presentou formalmente as súas alegacións á proposta final recollida no Estudo Ambiental Estratéxico (Alternativa 4) de Delimitación de Espazos e Usos Portuarios (DEUP) da Autoridade Portuaria de Vigo. O Goberno local reitera o seu rexeitamento ao mantemento e ampliación de usos comerciais e industriais no litoral de Chapela e Rande. A alcaldesa, Digna Rivas, trasladou á Autoridade Portuaria a necesidade de revisar a proposta para garantir a protección do patrimonio cultural, da paisaxe e da contorna natural da enseada de San Simón. Desde o Concello considérase que o documento mantén un modelo centrado na actividade loxística e industrial que resulta incompatible coa recuperación ambiental do litoral para que a cidadanía poida gozar destes espazos. En especial, o Goberno local insiste na necesidade de actuar sobre a contorna do Peirao de Pedra e do cargadoiro de mineral de Coto-Wagner. Rivas insiste no elevado valor patrimonial, histórico e paisaxístico destes espazos. O Concello reclama que neste tramo do litoral a Autoridade Portuaria avance “cara a un modelo máis equilibrado de relación porto-cidade, priorizando a recuperación ambiental, a integración paisaxística e a posta en valor do patrimonio fronte aos usos de almacenaxe e apoio loxístico”. Así mesmo, o Concello solicita reducir a superficie destinada a usos complementarios industriais na zona, revisar a delimitación prevista e incorporar medidas efectivas de rexeneración ambiental que melloren a calidade de vida da veciñanza de Chapela e Rande. Con este escrito, o goberno municipal reafirma o seu compromiso coa defensa do litoral de Redondela, a conservación do seu patrimonio e a procura dun modelo sustentable “que compatibilice actividade económica, protección ambiental e uso público do bordo marítimo.

Recreación do futuro Viveiro de Empresas de Redondela

– O Consorcio licitará antes do verán o proxecto de rehabilitación da antiga casa de Ponte da Lima que albergará o novo centro empresariaL, iniciativa na que van da man a Zona Franca e o Concello de Redondela. Zona Franca recibiu o informe positivo de Patrimonio da Xunta ao proxecto, que era o trámite que se agardaba para poder avanzar.

– A alcaldesa de Redondela, Digna Rivas, destacou que é “unha moi boa nova para o Concello e para toda a cidadanía de Redondela”, porque este proxecto tan importante para a vila está “máis preto de facerse realidade?. Rivas agradeceu ao delegado do Estado na Zona Franca o seu compromiso con Redondela porque este Centro de Negocios e Viveiro de Empresas suporá “un impulso aos novos emprendedores e as pemes”.

A Zona Franca de Vigo sacará a licitación no primeiro semestre deste ano o proxecto de rehabilitación da antiga casa situada na Praza de Ponte da Lima, coñecida popularmente como Praza da Petanca, un inmoble icónico que albergará o futuro Centro de Negocios e Viveiro de Empresas da vila. Zona Franca recibiu o informe positivo de Patrimonio da Xunta de Galicia ao proxecto, que era o trámite que se agardaba para poder avanzar. O espazo, que atenderá os estándares de calidade, sostibilidade, accesibilidade e eficiencia enerxética, será un complexo de emprendemento para dar resposta á demanda do tecido empresarial e facilitará “un maior e mellor servizo ás persoas emprendedoras”.

O CZFV, que asumirá o custo do futuro Centro de Negocios cun investimento estimado de 1,3 millóns de euros, xa solicitou a licenza de obra ao Concello de Redondela e, unha vez obtida, licitará as obras que poderían comezar a final de ano. A redacción do proxecto estivo a cargo da UTE formada por Díaz e Díaz Arquitectos S.L.P. e Castroferro Arquitectos S.C.P. co obxectivo de volver pór en valor unha edificación singular cun marcado carácter representativo dunha época, dotándoa dun novo uso para volver pola no foco de actividade da vila. Contempla que o Centro e Viveiro dispoña, entre outras instalacións, de salas de reunións, salas de usos múltiples para coworkings, ou espazos para contido cultural/expositivo. O delegado do Estado, David Regades, sinalou que “imos en prazo, e unha vez conseguido o visto e prace de Patrimonio ao proxecto básico, temos o camiño aberto”. Lembrou a ampla experiencia de Zona Franca na área de emprendemento “con viveiros, incubadoras e aceleradoras de start-ups que actualmente son referentes en todo o Estado”, e mostrouse optimista “coa gran oportunidade que se lles dá ás persoas emprendedoras e á capacidade de atracción de Redondela como centro empresarial: facilítanselles espazos, apóstase polo seu talento, e serán asesorados por persoal especializado”. O obxectivo é claro, dixo Regades, “seguir impulsando a economía, xerando emprego e incrementando a colaboración público-privada”.

A alcaldesa de Redondela, Digna Rivas, destacou que “é unha moi boa nova para ou Concello e para toda a cidadanía de Redondela, porque este proxecto tan importante para a vila está máis preto de facerse realidade”. Rivas agradeceu ao delegado do Estado na Zona Franca o seu compromiso con Redondela porque este Viveiro de Empresas suporá “un impulso aos novos emprendedores e as pemes. En pouco tempo veremos xa a transformación deste edificio tan emblemático”.

Unha vez que finalicen as obras do Centro de Negocios, a Zona Franca seguirá colaborando co Concello na dinamización das instalacións. Será o Concello quen asuma a xestión do Viveiro, de iniciativa e promoción municipal, fixará os criterios de acceso para a selección dos proxectos nos que priorizará as propostas máis innovadoras e as que máis postos de traballo poidan crear, determinará o regulamento de funcionamento ou as tarifas. Encargarase tamén do mantemento do edificio, horarios, servizos ou ingresos, así como do persoal, que dependerá directamente do Consistorio. A Zona Franca tamén disporá dun espazo de atención para as persoas emprendedoras e colaborará na selección das persoas usuarias.