Servizos Sociais e Benestar Social

O concelleiro Alberto Álvarez e a educadora Débora González con usuarios de Lenda que participan no programa.

– A campaña pioneira da concellería de Medio Ambiente, Lenda e Amorim Cork reúne preto de 100 quilos de tapóns de cortiza grazas á implicación da hostalaría local. Desde o Concello faise un chamamento á cidadanía e aos negocios para seguir sumando apoios.

O Concello de Redondela, a través da Concellería de Medio Ambiente, fai un balance moi positivo do primeiro ano de funcionamento de ‘Re-CORTIZA’, a campaña pioneira en Galicia para a recollida e reciclaxe de tapóns de cortiza. Desde a asociación Lenda, que recolle e clasifica as rollas das botellas, sinalan que reuniron xa preto de 100 quilos de cortiza, o que equivale a máis de 22.000 tapóns retirados do lixo común. Este proxecto pecha así seu primeiro ano cun dobre balance positivo: o beneficio social, co protagonismo da asociación redondelá Lenda, e o proveito ambiental.

Terapia ocupacional e inclusión da asociación Lenda

O proxecto converteuse nunha ferramenta de integración e visibilidade para as persoas usuarias do Centro de Rehabilitación Psicosocial e Laboral da asociación de saúde mental Lenda. Elas so as encargadas de recoller de xeito periódico os tapóns de cortiza nos bares e restaurantes adheridos para logo clasificalos e almacenalos. Esta tarefa proporciónalles unha rutina laboral, fomenta o traballo en equipo e mellora a súa autonomía. Ademais, en virtude do acordo acadado con empresa Amorim Cork, a empresa remunerará economicamente a Lenda polos quilos de cortiza entregados, un retorno económico directo que se investirá en mellorar os programas sociais e terapéuticos da entidade redondelá.

Economía circular e redución de residuos

No aspecto medioambiental, ‘Re-CORTIZA’ cumpriu o obxectivo de evitar que este volume de residuos rematase nos vertedoiros, transformándoo nun recurso de gran valor. A implicación dos hostaleiros de Redondela permitiu canalizar a cortiza cara á economía circular. Agora, grazas á empresa Amorim Cork, este material natural terá unha segunda vida útil en sectores punteiros da construción como illamento e revestimento, para a fabricación de compoñentes aeronáuticos, material deportivo ou artesanía.

Chamamento á hostalaría e veciñanza

O concelleiro de Medio Ambiente, Alberto Álvarez, amosouse moi satisfeito con este dobre impacto: “Cando iniciamos ‘Re-CORTIZA’ fixemos un chamamento á hostalaría porque é onde máis se xera este residuo. Os datos constatan que a resposta foi moi positiva. O proxecto permite reducir residuos e, o máis importante, ofrece unha alternativa ocupacional e terapéutica de calidade no día a día ás persoas de Lenda”. Tras este primeiro ano, o Concello de Redondela quere consolidar o proxecto, polo que fai un chamamento a toda a cidadanía e, de xeito moi especial, aos establecementos de hostalaría que aínda non participan para que se sumen a este proxecto de economía circular. O obxectivo é seguir medrando e estendendo esta rede sostible por todo o municipio.

Para os locais comerciais o proceso é totalmente de balde e moi sinxelo, tan só teñen que contactar co Concello de Redondela ou directamente coa Asociación Lenda. O persoal do proxecto achegarase ao local para deixarlles un colector de cartón específico da campaña. Os hostaleiros só teñen que gardar aí os tapóns de cortiza das botellas. Cando o colector estea cheo, as persoas de Lenda pasarán de xeito periódico a recollelo e baleiralo.

Dende o Goberno local animan tamén á veciñanza a colaborar a nivel particular depositando as rollas de cortiza nos colectores que poden atopar en diferentes edificios municipais como a Casa do Concello, os Multiúsos da Xunqueira e Piñeiral do Crego e as Prazas de Abastos de Redondela e Chapela.

Digna Rivas e Iria Vilaboa xunto á Policía Nacional de Participación Cidadá que visita os campamentos 

– Rapazada de 3 a 12 anos participa nestas actividades nas diferentes parroquias. A alcaldesa, Digna Rivas, sinala que os campamentos municipais ofrecen ás familias “un espazo de lecer seguro, educativo e de calidade para nenos e nenas durante as vacacións escolares, tanto no mes de xullo como en agosto”.

O Concello de Redondela fai un balance moi positivo do Programa Municipal de Conciliación de Verán durante o pasado mes de xullo. O servizo municipal pechou o seu primeiro tramo cun gran éxito de participación. A alcaldesa, Digna Rivas, sinala que esta actividade ofrece ás familias “un espazo de lecer seguro, educativo e de calidade para os nenos e nenas do municipio durante as vacacións escolares”.

O campamento de conciliación non para e continúa activo durante todo este mes de agosto. A ampliación do servizo foi impulsada polo Goberno de Rivas, xa que en mandatos anteriores os campamentos estivais limitábanse ao mes de xullo. Con esta medida, ofrécense 180 prazas adicionais no mes de agosto para dar unha cobertura total ás familias e facilitar a conciliación os dous meses de vacacións. En conxunto, o Concello ofrece 480 prazas nos campamentos de verán. Rivas, explica que o Concello “aposta por achegar os servizos a toda a veciñanza, tanto na vila como nas parroquias, para facilitar o acceso aos campamentos e reducir os desprazamentos das familias”. Pola súa banda, a concelleira de Igualdade, Iria Vilaboa, destaca que o seu departamento ofrece un servizo “que favorece a conciliación de responsabilidades familiares e laborais, ao tempo que permite a nenos e nenas participar en actividades lúdicas”.

A rapazada que participa nos campamentos recibiu a visita do equipo de Partición Cidadá da Policía Nacional da comisaría Vigo-Redondela. Os axentes imparten aos nenos e nenas charlas para previr o acoso escolar, danlles pautas sobre seguridade e amósanlles os vehículos policiais, as sirenas e o equipamento básico.

Digna Rivas con profesorado e alumnado de Mediación Comunicativa do IES Chapela no Día Nacional da Lingua de Signos

– O Goberno local abre o prazo de preinscrición do 7 ao 19 de agosto para unha formación dirixida a maiores de idade, cun custo subvencionado de 50 euros. Tamén se oferta un obradoiro para os empregados públicos co obxectivo de eliminar as barreiras de comunicación na administración.

O Concello de Redondela, a través da Concellería de Servizos Sociais e Igualdade, aposta pola inclusión real e a eliminación das barreiras comunicativas cun programa formativo en Lingua de Signos. Co obxectivo de construír un municipio máis accesible e cohesionado, o goberno local ofrece formación aberta á veciñanza, ao tempo que capacitará aos seus propios traballadores públicos para mellorar a atención directa ás persoas xordas.

A alcaldesa de Redondela, Digna Rivas, sinalou a importancia de que a propia administración dea o primeiro paso: “A nosa prioridade é avanzar cara a unha administración 100% accesible, onde calquera veciño ou veciña poida ser atendido con dignidade e sen atrancos comunicativos; formar ao noso persoal é un acto de xustiza social e eficacia pública”. Pola súa banda, a concelleira de Igualdade, Iria Vilaboa, puxo en valor o impacto da formación para a poboación: “Queremos dotar á veciñanza de ferramentas que fomenten a empatía e a igualdade no día a día, garantindo unha convivencia integradora onde ninguén quede á marxe”.

Por unha banda, a formación destinada á cidadanía maior de 18 anos consta de 30 horas lectivas cun curso subvencionado que se impartirá no Multiúsos da Xunqueira. Será os mércores e venres de 17:00 a 19:30 horas, e comezará o 4 de setembro. O prazo de preinscrición estará aberto do 7 ao 19 de agosto a través do Rexistro Xeral ou da Sede Electrónica. O custo é de 50 euros. Unha vez confirmada a praza, os admitidos terán tres días hábiles para facer o pago na Oficina de Recadación ou na sede virtual.

Como novidade e reforzo institucional desta campaña, o Concello ofrece unha formación específica de 10 horas de duración dirixida ao persoal municipal. Este curso ten como obxectivo dotar aos traballadores públicos de ferramentas para facer da administración local un espazo de inclusión real.