Servizos Sociais e Benestar Social

A alcaldesa, Digna Rivas, e a concelleira Iria Vilaboa con representantes das entidades que forman parte da Mesa Local de Saúde

– Será o venres 26 de xuño, organziada pola Mesa Local de Saúde co lema “Coidando a saúde, construímos comunidade”. A programación inclúe obradoiros, charlas de prevención e un Trivial con premios, todas elas actividades gratuítas. Un dos eixos da feira será a concienciación cidadá fronte ás adicións.

– A alcaldesa, Digna Rivas, salienta “o traballo extraordinario” da Mesa Local de Saúde para esta feira na que participan múltiples entidades,e agarda que sexa un punto de encontro onde a veciñanza aprenda a coidarse e atope ferramentas para mellorar a súa calidade de vida “nunha comunidade máis forte”.

A Mesa Local de Saúde de Redondela organiza a I Edición da Feira da Saúde e o Benestar, que se celebrará o vindeiro venres 26 de xuño na Alameda de Redondela. O evento, que conta coa colaboración do Concello e de numerosas entidades do sector social e sanitario. Desenvolverase en horario de mañá, de 10:00 a 13:30 h, e de tarde, de 17:00 a 20:00 h, co lema “Coidando a saúde, construímos comunidade”.

A alcaldesa de Redondela, Digna Rivas, destacou o “traballo extraordinario e transversal” que realiza a Mesa Local de Saúde coordinando a todas as asociacións e profesionais para facer realidade esta primeira edición da feira. Esta iniciativa demostra que a prevención e o benestar “son piares fundamentais para a sociedade e para este Goberno local”. A Alameda será un punto de encontro onde a veciñanza poderá aprender a coidarse e atopará ferramentas para mellorar a súa calidade de vida, “porque coidando a saúde de cada persoa, construímos unha comunidade máis forte”, sinala Rivas.

A xornada comezará ás 10:00 h coa inauguración oficial. Ao longo do día, as diferentes asociacións e colectivos que integran e colaboran coa Mesa Local de Saúde ofrecerán actividades de balde:

• Prevención e coidados: O Colexio de Farmacéuticos de Pontevedra ofrecerá unha charla sobre o uso responsable de medicamentos, a AECC falará sobre a prevención do cancro de pel, e a Cruz Vermella impartirá obradoiros de Primeiros Auxilios e Autocoidado Emocional.

• Benestar mental e social: A Asociación Lenda organizará mesas redondas dedicadas á saúde mental e xogos de petanca.

• Día Internacional contra o Narcotráfico: Érguete fará á lectura do Manifesto polo Día Internacional da Loita contra o Uso Indebido e Tráfico Ilícito de Drogas para reivindicar a prevención, a educación e o apoio social como ferramentas para combater o narcotráfico e protexer a saúde pública

• Movemento e dinamización: Pola tarde haberá espazo para o exercicio físico cunha exhibición de Tai ChiGong de ASEARPO e un obradoiro de xerontoximnasia do CAPM Redondela. Ademais, o Centro de Saúde de Redondela organizará un Trivial da Saúde con premios para os que se inscriban previamente.

A organización convida a toda a veciñanza a achegarse á Alameda o vindeiro venres 26 de xuño para gozar desta xornada lúdica e saudable.

Bloque de Mañá

• 10:00h – 10:30h

◦ Inauguración da I Feira da Saúde e Benestar do Concello de Redondela.

• 10:30h – 11:15h

◦ Trivial da Saúde (Centro de Saúde Redondela) – Ubicación: Carpa.

◦ Petanca – Ubicación: Stand da Asociación Lenda.

• 11:30h – 12:00h

◦ Mesa redonda: A saúde mental (Asociación Lenda) – Ubicación: Carpa.

• 12:00h – 12:30h

◦ Charla: Prevención do cancro de pel (AECC) – Ubicación: Carpa.

• 12:30h – 13:15h

◦ Obradoiro: Primeiros Auxilios (Cruz Vermella) – Ubicación: Carpa.

• 13:15h – 13:30h

◦ Lectura do Manifesto polo Día Internacional da Loita contra o Uso Indebido e Tráfico Ilícito de Drogas (Asociación Érguete) – Ubicación: Carpa.

Bloque de Tarde

• 17:00h – 17:15h

◦ Exhibición: Tai Chi Gong (ASEARPO) – Ubicación: Carpa.

• 17:15h – 18:00h

◦ Charla: Uso responsable dos medicamentos: Riscos e Erros da automedicación (Colegio Farmacéuticos Pontevedra) – Ubicación: Carpa.

• 17:30h – 18:15h

◦ Obradoiro: Autocoidado Emocional (Cruz Vermella) – Ubicación: Carpa.

• 18:15h – 18:45h

◦ Mesa redonda: A Saúde mental (Asociación Lenda) – Ubicación: Carpa.

• 18:45h – 19:30h

◦ Obradoiro: Xerontoximnasia (CAPM Redondela) – Ubicación: Carpa.

◦ Petanca (Información no Stand do Centro de Saúde Redondela).

– O novo servizo atende a nenos e nenas de Redondela, Soutomaior, Pazos de Borbén e Fornelos. Está dirixido a menores de 0 a 6 anos que presentan trastornos no desenvolvemento ou risco de padecelos. O equipo de especialistas está formado por unha logopeda, unha psicóloga e unha fisioterapeuta pediátrica.

– Os menores accederán a este recurso público e gratuíto mediante derivación do seu pediatra de referencia. A alcaldesa de Redondela, Digna Rivas, explicou que se trata dun servizo público e gratuíto “imprescindible” para moitas crianzas e as súas familias, que agora poderán acceder “de xeito precoz e no seu entorno máis próximo”.

A alcaldesa de Redondela, Digna Rivas, xunto aos alcaldes de Soutomaior, Manuel Lourenzo, e Pazos de Borbén, Xosé Luciano Otero, visitaron onte o novo Servizo de Atención Temperá (SAT), situado na rúa Isidoro Queimaliños, 2, en pleno centro histórico da vila.

Este recurso nace como froito da colaboración entre os concellos de Redondela, Soutomaior, Pazos de Borbén e Fornelos de Montes para ofrecer unha atención especializada a nenas e nenos de entre 0 e 6 anos. O servizo está dirixido a menores que presenten trastornos no desenvolvemento ou risco de padecelos. Segundo os datos do IGE, a área de influencia dos catro municipios suma 1.647 menores nesa franxa de idade, estimándose que arredor do 10 % poderá precisar este apoio nalgún momento.

Un modelo integral centrado na contorna familiar

O servizo, integrado na Rede Galega de Atención Temperá e cofinanciado pola Unión Europea (Programa FSE+ Galicia 2021-2027), está xestionado pola Confederación Galega de Persoas con Discapacidade (COGAMI). A diferenza dos modelos tradicionais, este SAT aposta por unha intervención centrada na familia. O obxectivo é que os profesionais acompañen aos pais e nais nas rutinas diarias (comidas, xogo, hixiene) para converter cada momento nunha oportunidade de aprendizaxe e autonomía, sen engadir cargas extras ás familias.

O equipo multidisciplinar está formado por Andrea Álvarez (psicóloga), Paula Piñeiro (logopeda) e Paula Hernando (fisioterapeuta pediátrica). Este grupo de expertas traballará de xeito coordinado cos recursos de sanidade, servizos sociais e educación da comarca.

Compromiso coa infancia e acceso gratuíto

A alcaldesa Digna Rivas destacou que este servizo é “imprescindible” e responde ao obxectivo prioritario da Concellería de Infancia, un departamento impulsado ao inicio do mandato pola exconcelleira e pediatra Pilar Martínez. “Pili traballou arreo para poñer este recurso a disposición das familias de xeito precoz e na súa contorna máis próxima” e agora por fin é unha realidade, sinala Rivas. Deste xeito “optimizamos os resultados e garantimos unha inclusión plena dos menores”, conclúe a alcaldesa.

Pola súa banda, os alcaldes da agrupación valoraron moi positivamente o SAT, subliñando que o servizo é “público e gratuíto”. Para acceder a el, os nenos e nenas deberán ser derivados polo seu pediatra de referencia tras detectar ou sospeitar de calquera desafío no desenvolvemento.

Na visita institucional tamén estiveron o coordinador do SAT, Álvaro García e Celso Álvarez en representación da Directiva de COGAMI, entidade que achega a súa ampla experiencia na xestión de servizos especializados e a defensa dos dereitos das persoas con discapacidade.

– As clases de baile “Ritmo vital”, novidade deste curso, son todo un éxito con 120 participantes en Redondela e Chapela. As aulas de Tai Chi “Equilibrio vital” e “Memoria Viva”, con talleres cognitivos, repiten como en anos anteriores con preto de 400 e 320 alumnos e alumnas respectivamente. Todas as actividades son de balde e realízanse nas diferentes parroquias por parte da concellería de Maiores.

– A alcaldesa, Digna Rivas, e a concelleira Iria Vilaboa, visitaron hoxe ao alumnado no primeiro día de clases e comprobaron “o gran éxito destas actividades con máis participantes cada ano”. Rivas lembra que o obxectivo destes programas é “mellorar o estado físico e cognitivo das persoas maiores e favorecer as súas relacións sociais, xa que todo redunda nunha maior calidade de vida”.

Esta semana comezaron os programas para maiores de 55 anos “Ritmo Vital”, con clases de baile, “Equilibrio Vital”, coa práctica de Tai Chi, e “Memoria Viva” con talleres cognitivos. Todas as actividades acadaron un gran éxito de participación. As clases de baile son a novidade deste curso, e súmanse ás clases de Tai Chi e Memoria que se imparten desde hai anos. A modalidade de baile estreouse o pasado verán con clases ao aire libre e tivo unha gran acollida entre o público. “En resposta á demanda dos veciños e veciñas incorporamos o baile tamén ás actividades anuais”, explica a alcaldesa Digna Rivas. O Concello fai así un esforzo “para mellorar a calidade de vida dos nosos maiores”. A rexedora achegouse esta mañá ao pavillón da Marisma onde comezaron as clases de baile para comprobar “o gran éxito que supón esta actividade, cunha excelente resposta por parte das persoas maiores”. Son un total de 120 as veciñas e veciños que participan nesta actividade que se estrea este curso en Redondela e Chapela. No caso do Tai Chi, que comezou esta mañá en Chapela, repite a boa acollida de anos anteriores con 390 participantes entre os pavillóns municipais González Soto e a Marisma, ademais das clases en Saxamonde, Quintela, Cedeira, CCR Chapela, Reboreda, Ventosela-Miñoteira, Saramagoso, Cabeiro, Negros, Cesantes e CC Vilar.

As clases de “Memoria Viva” realízanse en 17 emprazamentos diferentes, con clases en todas as parroquias. Trátase de cursos de estimulación cognitiva para exercitar diferentes áreas cerebrais. O seu obxectivo principal é manter a mente activa, ralentizar o deterioro cognitivo, mellorar a atención e a concentración e fomentar a socialización. Como en anos anteriores conta tamén con moita demanda, con 320 participantes.

Actividades de balde en todas as parroquias

Estas actividades, organizadas pola concellería de Maiores que dirixe Iria Vilaboa, impártense en 16 emprazamentos diferentes por todas as parroquias de Redondela. A alcaldesa sinala a importancia de que estas clases se oferten non só nos núcleos urbanos de Redondela e Chapela, senón tamén nas demais parroquias do municipios “para que todos os veciños e veciñas poidan acceder a estes servizos sen ter que desprazarse”. Todas as actividades son de balde, “para que todas as persoas o que o desexen poida asistir, independentemente da súa situación económica”. A rexedora salientou “a boa acollida destes cursos ano tras ano entre a veciñanza, que son un éxito rotundo”.

A concelleira, Iria Vilaboa, explica que os obradoiros que teñen como obxectivo “previr o deterioro físico e cognitivo das persoas maiores e mellorar a súa calidade de vida”. O número de participantes increméntase cada ano, con máis grupos en todas as parroquias. A valoración que fan os participantes é “moi boa”, xa que estas actividades permítenlles mellorar a nivel físico e mental, e ademais “fomentan as súas relacións sociais e melloran a calidade de vida”.