Urbanismo

Estado actual do camiño dos Lagos, en Cabeiro.

– O Goberno local pon en marcha os primeiros proxectos do Plan de Investimentos de Camiños Municipais. Xa están adxudicadas as obras para comezar a reforma integral en Chapela do pavimento no camiño da Horta, en Río Frío, os camiños dos Lagos e Peiteados, no barrio da Igrexa, e a reparación do Camiño do Penedo, en Porto Cabeiro.

– A alcaldesa, Digna Rivas, avanza que a vindeira semana formalizaranse os contratos para comezar as obras nos camiños de Outeiro das Penas e de San Pedro, en Cesantes, e o camiño dos Tereixos en Reboreda. O plan do Goberno local, cun investimento de 2,7 millóns de euros, permitirá reformar e mellorar un total de 68 camiños en todas as parroquias do municipio.

O Concello de Redondela avanza na execución do seu Plan de Investimento nos camiños municipais coa adxudicación dos primeiros proxectos de pavimentación. As actuacións iniciais arrancarán proximamente nas parroquias de Chapela e Cabeiro. As obras forman parte da folla de ruta municipal para actuar nun total de 68 viarios públicos cun orzamento global que supera os 2,7 millóns de euros, orientado a corrixir o firme, previr inundacións e reforzar a seguridade viaria nas parroquias.

En Chapela realizarase unha mellora integral do pavimento. A superficie a renovar será duns 500 m2. En Cabeiro executaranse dous proxectos: a renovación asfáltica e posta a punto da rede de pluviais nos camiños dos Lagos, con 200 metros de longo, e Peiteados , con 132 metros, por 29.367,80 euros. Tamén está contratada a reparación da capa de rodadura no Camiño do Penedo, de 176 metros de lonxitude en Porto Cabeiro por 25.577,89 euros.

A maiores destas obras xa adxudicadas, o executivo local formalizará esta semana outros tres contratos: en Cesantes farase a reforma integral do camiño de Outeiro das Penas e o de San Pedro, mentres que en Reboreda farase a adxudicación para a reforma do camiño dos Tereixos. A alcaldesa de Redondela, Digna Rivas, subliñou a importancia de materializar estes primeiros contratos “que responden ás propias demandas dos veciños e veciñas e que foron aprobados por unanimidade nos respectivos Consellos Parroquiais”.

Investimento histórico nos camiños parroquiais

O concelleiro de Infraestruturas e Sostibilidade, Roberto Villar, salientou que é a primeira vez en 15 anos que se fai un investimento deste tipo nos camiños municipais das parroquias. O edil salientou ademais que “o 70% dos proxectos que se van a executar foron realizados polos propios técnicos municipais, o que significa un gran aforro para as arcas do Concello”. Villar incidiu tamén nos aspectos técnicos e de respecto ambiental do proxecto: “Non nos limitamos a botar unha nova capa de asfalto. Todas as actuacións aprobadas inclúen criterios de sostibilidade, como a modernización e ampliación das redes de augas pluviais e o uso de materiais de alta durabilidade. Con isto evitamos asolagamentos, garantimos unha maior resistencia fronte ao cambio climático e reducimos os custos de mantemento a longo prazo”.

– O Concello de Redondela continúa avanzando na mellora das infraestruturas viarias do municipio cun investimento próximo aos 400.000 euros para a renovación integral da Subida a Trasmañó e da Estrada da Autopista, unha actuación moi demandada pola veciñanza e fundamental para mellorar a seguridade e a mobilidade nesta zona do municipio.

– A alcaldesa, Digna Rivas, destacou que é unha actuación “estratéxica” para Trasmañó e para toda a contorna. Rivas engadiu que “seguimos demostrando que este Goberno municipal transforma as demandas da veciñanza en proxectos e investimentos reais, priorizando aquelas actuacións que melloran o día a día das persoas e que contribúen a un concello máis seguro e mellor comunicado”.

O proxecto divídese en dúas fases. A primeira, financiada con cargo ao remanente municipal, conta cun investimento de 137.898,39 euros e xa se atopa en proceso de licitación, permanecendo aberto o prazo de presentación de ofertas ata o vindeiro 13 de xullo. A segunda fase, cun investimento aproximado de 264.000 euros, será financiada a través do Plan + Provincia da Deputación. Na actualidade está pendente da concesión definitiva da subvención e da autorización de Patrimonio da Xunta de Galicia, último trámite para proceder á súa licitación.

En conxunto, ambas actuacións permitirán renovar preto de 1,4 quilómetros de vial, actuando sobre unha superficie de máis de 8.800 metros cadrados. Os traballos inclúen a pavimentación con aglomerado asfáltico en quente, a mellora integral da drenaxe con novas beiravías, entubados para evitar acumulacións de auga e o ensanche da plataforma nos puntos onde é posible. Tamén se construirán muros de mampostería para reforzar a estabilidade da estrada. Para mellorar a mobilidade e a seguridade na estarda, substituiranse e ampliaranse as biondas de protección, instalaranse reductores de velocidade, o cruzamento co Camiño de Santiago reformarase con pavimento de pedra, e executaranse diferentes actuacións de conservación e limpeza de beiravías e noiros.

A alcaldesa de Redondela, Digna Rivas, destacou que é unha actuación “estratéxica” para Trasmañó e para toda esta contorna. “É unha estrada moi utilizada cada día por centos de veciños e veciñas e que necesitaba unha intervención integral. Con este investimento de preto de 400.000 euros damos resposta a unha demanda histórica, mellorando a seguridade, a mobilidade e a calidade dunha infraestrutura esencial para comunicar Trasmañó, Cabanas e outras parroquias próximas”. Rivas engadiu que “seguimos demostrando que este Goberno municipal transforma as demandas da veciñanza en proxectos e investimentos reais, priorizando aquelas actuacións que melloran o día a día das persoas e que contribúen a un concello máis seguro e mellor comunicado”.

Pola súa banda, o concelleiro de Infraestruturas, Roberto Villar, subliñou que “o proxecto non consiste unicamente en botar un novo firme, senón que supón unha renovación integral da estrada, solucionando problemas históricos de drenaxe, reforzando a seguridade viaria e actuando sobre todos naqueles elementos que permitirán prolongar a vida útil desta infraestrutura durante moitos anos”.

– Ante a imposibilidade de sacar adiante o proxecto con fondos propios pola negativa do pleno, o Goberno local buscou unha alterantiva de financiamento para sacar adiante este proxecto “prioritario” para o Concello. A alcaldesa, Digna Rivas, anunciou onte aos colectivos culturais e á propia familia de Ángel Barros que o Concello obtivo financiamento para a creación do Museo Municipal que albergará a obra do artista redondelán.

A proposta económica do Goberno local recollía unha achega de 466.800 euros de fondos propios do Concello (o 40% do custo total) e o resto do investimento, ata acadar os 1.167.000 euros, con axudas da UE xa aprobadas. O pleno da corporación rexeitou esta posiblidada, polo que o Goberno local buscou unha alternativa, xa que se trata dun proxecto totalmente “prioritario” para o municipio. Digna Rivas anunciou que a execución do museo asumirase a través do programa bianual Plan +Provincia 2026-2027 da Deputación de Pontevedra, garantindo así que a dotación non quede paralizada. A alcaldesa e Roberto Villar, concelleiro de Infraestruturas e Sostibilidade, anunciaron onte aos colectivos culturais que impulsaron o museo e á propia familia de Ángel Barros que o Concello obtivo financiamento para a crear o espazo museístico que albergará a obra do artista redondelán. A asociación Amigos de Ángel Barros e o colectivo cultural Alén Nós aplaudiron o anuncio do Concello “para facer realidade esta obra tan agardada”. Amosáronse satisfeitos coas xestións do Goberno local para buscar un financiamento alternativo e agradeceron tamén “o apoio de todas as persoas que asinaron o manifesto de apoio á construción do museo”.

Na imaxe, de esquerda a dereita: Gonzalo Balo e Andrés Laxe, de Alén Nós, a alcaldesa Digna Rivas, a secretaria da Asociación Amigos de Ángel Barros, Noemí Moreira, e o concelleiro de Infraestruturas e Sostibilidade, Roberto Villar, no solar no que se construirá o Museo Municipal, situado na avenida Mendiño.