Cultura

– A alcaldesa, Digna Rivas, amosou o seu orgullo polo resultado da xornada: “Ver as nosas prazas e rúas ateigadas de xente, con familias enteiras gozando do talento de compañías de primeiro nivel, confirma que Redondela é un referente cultural indispensable. Esta aposta pola cultura na rúa, gratuíta e accesible, devolve á cidadanía o protagonismo do espazo público a través da arte,a música e a ilusión”.

O Concello de Redondela amosa a súa gransatisfacción polo éxito absoluto de público acadado no XXVII Festival de Artistas de Rúa celebrado onte na vila cunha gran acollida por parte do público. Milleiros de persoas, entre vecilanza e visitantes, respondero á chamada da cultura, enchendo de vida, cor e maxia o centro urbano do municipio e consolidando o evento como un dos grandes fitos do verán.

A programación arrancou ás 18:30 horas na Alameda Castelao co espazo de xogos O fogar de Breogán, a cargo de Bico de Toupa, que congregou a numerosas familias nunha viaxe lúdica ás nosas raíces castrexas. O ambiente festivo continuou en aumento coa compañía redondelá Tanxarina e o seu aclamado espectáculo Titiricircus na rúa Salgueiral.

O dinamismo musical e visual estendeuse polo corazón da vila co pasarrúas O Minúsculo, que deixou abraiados a grandes e cativos cunha marioneta xigante de cinco metros de altura. Logo a compañía Pablo Méndez Performances marabillou aos presentes co seu espectáculo Quimera, un impresionante despregue visual de acrobacias, mitoloxía e luces. A alcaldesa de Redondela, Digna Rivas, amosou o seu orgullo polo resultado da xornada: “Ver as nosas prazas e rúas ateigadas de xente, con familias enteiras gozando do talento de compañías de primeiro nivel, confirma que Redondela é un referente cultural indispensable. Esta aposta pola cultura na rúa, gratuíta e accesible, devolve á cidadanía o protagonismo do espazo público a través da arte e a ilusión”.

Ao longo da noite, a música e o ilusionismo completaron unha xornada redonda. A pista da Xunqueira acolleu un multitudinario concerto do artista urbano Eleg1do, que fixo bailar ao público máis novo cos seus éxitos virais. A xornada rematou co espectáculo do Mago Orbit puxo o broche de ouro nunha praza da Torre ateigada de público co seu espectáculo Acero 2.0, un show de grandes ilusións e maxia de alto impacto ao máis puro estilo das Vegas.

Dende o goberno local destacan que este éxito masivo confirma o acerto de apostar por formatos de rúa gratuítos e de calidade. Como complemento de dinamización económica, o goberno local cualificou tamén de éxito rotundo a celebración do Shopping Night, unha iniciativa do comercio local en colaboración co Concello que mantivo os establecementos abertos ata altas horas con descontos e actividades especiais, rexistrando un gran volume de vendas e unha extraordinaria animación nas rúas comerciais. O Concello agradece a implicación de comerciantes, artistas e público para facer posible este día inesquecible.

– Ao longo do mes de agosto celébranse roteiros e visitas guiadas gratuítas por diferentes parroquias do municipio para dar a coñecer o patrimonio histórico e natural de Redondela. Son propostas para todos os públicos con guías profesionais que fan máis enriquecedora a experiencia.

– A “Orientaventura Cultural” en Vilar de Infesta, unha ruta botánica pola vila ou os muíños do río Pexegueiro son algunhas das novidades. Os concelleiros Rita Pérez e Roberto Villar salientan o traballo conxunto para ofrecer un lecer “educativo, integrador e respectuoso coa contorna”. Inscricións na Oficina Municipal de Turismo.

O Concello de Redondela presenta a programación dos Roteiros Ambientais e Culturais que se celebrarán en agosto. Tras o éxito acadado en edicións anteriores, no vindeiro mes as propostas amplíanse con novos itinerarios e propostas para o público familiar.

Vilar de Infesta acollerá a actividade “Orientaventura Cultural” (martes 25), unha proposta lúdica dirixida a familias e mozos de entre 10 e 15 anos. O calendario tamén estrea a ruta “Usos das Plantas da Vila” (domingo 9), para descubrir as aplicacións tradicionais da flora local, xunto con interesantes percorridos como “As Pedras de Ventosela” (domingo 9), “Terras de Saxamonde e Vilar de Infesta” (domingo 23) e o roteiro polos muíños do río Pexegueiro (sábado 29).

A concelleira de Cultura e Turismo, Rita Pérez, subliñou o compoñente pedagóxico e de identidade destas propostas: “Queremos que a veciñanza e os visitantes se convertan en dinamizadores do noso propio relato histórico. Coa Orientaventura e os novos paseos urbanos abrimos o abano para que a mocidade e as familias descubran o noso patrimonio cultural, que está vivo e accesible para todos”.

Pola súa banda, o concelleiro de Infraestruturas e Sostibilidade, Roberto Villar, fixo fincapé no valor ecolóxico do programa: “Os trazados por Ventosela ou Saxamonde demostran o noso compromiso coa divulgación ambiental e a posta en valor do noso interior. Deseñamos estes dezaseis roteiros para gozar da nosa enorme biodiversidade sen deixar pegada, promovendo un turismo sostible que coida os nosos ríos, montes e o litoral”.

Calendario completo de actividades (Agosto 2026):

• Sábado 1: Paseo nocturno polo río Maceiras (21:00 – 23:00 h).

• Domingo 2: Ruta ambiental “A Intermareal de Cesantes” (10:00 – 13:00 h).

• Martes 4: Visita guiada ao Cemiterio dos Eidos (19:00 – 20:00 h).

• Domingo 9: Ruta ambiental “As Pedras de Ventosela” (09:30 – 13:00 h).

• Domingo 9: Ruta ambiental “Usos das Plantas da Vila” (19:00 – 21:00 h).

• Martes 11: Visita guiada “As Mulleres da Vila: Da Historia á Memoria” (19:00 – 20:00 h).

• Martes 18: Visita guiada ao Cemiterio dos Eidos (19:00 – 20:00 h).

• Venres 21: Kayak turístico á Portela (11:00 – 12:30 h, 20 €).

• Venres 21: Paseo nocturno “Observación Xeográfica, Histórica e Natural da Ría de Vigo” no Miradoiro do Outeiro Grande (20:00 – 22:30 h).

• Domingo 23: Ruta ambiental “Terras de Saxamonde e Vilar de Infesta” (10:00 – 13:00 h).

• Martes 25: Visita guiada “As Mulleres da Vila: Da Historia á Memoria” (19:00 – 20:00 h).

• Martes 25: “Orientaventura Cultural de Vilar de Infesta” (Familias e rapazada de 10 a 15 anos, 19:00 – 21:00 h).

• Sábado 29: Ruta ambiental longa “O Río Pexegueiro” (09:00 – 13:00 h).

• Sábado 29: Visita guiada teatralizada no Museo Meirande (Dous pases: 16:30 e 18:00 h).

• Domingo 30: Ruta ambiental “O Litoral de Soutoxuste” (10:00 – 13:00 h).

• Domingo 30: Kayak na Enseada de San Simón (10:30 – 13:00 h, 20 €).

Inscricións e reservas

A maioría das propostas son gratuítas, fóra das saídas en kayak que teñen un custo de 20 € por persoa. Para garantir a calidade de cada percorrido, todas as actividades teñen prazas limitadas con reserva previa na oficina de Turismo:

• Teléfono de contacto: 986 401 713

• Correo electrónico: turismo@redondela.gal

– A alcaldesa, Digna Rivas, destaca que o venres 31 de xullo a vila será “un gran escenario ao aire libre co mellor ambiente cultural e festivo”. Rúas e prazas acollerán un completo programa gratuíto con ilusionismo, teatro, acrobacias, música urbana e xogos tradicionais. O Mago Orbit, Lg1do, Pablo Méndez Performance e Tanxarina serán algúns dos protagonistas.

– A xornada complétase un ano máis coa proposta do comercio local. Máis de 40 establecementos abrirán ata a media noite con rebaixas de ata o 70 %, música en directo, sorteos e sorpresas.

O Concello de Redondela presentou a programación do XXVII Festival ‘Artistas de Rúa’, unha gran cita cultural que encherá de maxia os espazos públicos da vila o vindeiro venres 31 de xullo. Esta nova edición compartirá protagonismo coa ‘Aloha! Shopping Night’, unha iniciativa na que 44 establecementos comerciais e hostaleiros abrirán en horario estendido para ofrecer unha experiencia única de lecer e compras. A alcaldesa de Redondela, Digna Rivas, amosou o seu orgullo por conseguir unificar un ano máis dúas citas tan potentes no calendario local. “Queremos que Redondela sexa ese venres un gran escenario ao aire libre, cheo de vida e ilusión para as familias, pero tamén un motor de dinamización económica”, sinalou a rexedora. Rivas fixo fincapé na importancia de apoiar ao tecido empresarial da vila: “A nosa hostalaría e o comercio de proximidade son os que dan vida a Redondela todos os días do ano; con esta xornada compartida de actividades creamos o escaparate perfecto para que a xente de fóra nos visite, consuma no noso comercio e descubra todo o que podemos ofrecer nun ambiente inmellorable”.

Gran despregue do XXVII Festival Artistas de Rúa

A programación artística arrancará pola tarde e estenderase de xeito ininterrompido ata a media noite con propostas de balde:

• 18:30 h | O Xogar de Breogán (Alameda de Castelao): Xogos de madeira de temática castrexa e sección de autómatas para conectar coas raíces e a historia celta.

• 19:15 h | Tanxarina: Titiricircus (Rúa Salgueiral): Un emotivo e participativo espectáculo de marionetas de fío que rende homenaxe ás glorias do vello circo.

• 20:15 h | Pasarrúas: O Minúsculo (Inicio na Praza de Ribadavia): Gran desfile multidisciplinar protagonizado por unha impactante marioneta de fío de cinco metros de altura.

• 21:30 h | Pablo Méndez Performances: Quimera (Praza do Concello): Espectáculo visual e acrobático inspirado na mitoloxía e na maxia da natureza.

• 22:30 h | Lg1do, Artista Urbano (Pista da Xunqueira): Concerto en directo dunha das grandes promesas musicais de Galicia, fusionando trap e reguetón en galego e español.

• 23:30 h | Mago Orbit: Acero (Praza da Torre): Broche de ouro cun show de ilusionismo de alto impacto e luces ao máis puro estilo das Vegas.

‘Aloha! Shopping Night’: Compras, descontos e animación

Como o complemento perfecto á oferta cultural, desde as 19:00 horas o tecido comercial sumará a súa propia animación. Máis de 40 establecementos ofrecerán interesantes descontos de ata o 70 % con promocións, música e sorpresas para os clientes. A Praza da Constitución acollerá postos especiais na rúa e varios locais de hostalaría ofrecerán propostas especiais para cear.

Digna Rivas pechou a presentación convidando a toda a veciñanza e dos concellos da comarca a achegarse a Redondela o vindeiro 31 de xullo “para vivir unha noite máxica de cultura, diversión, ocio e compras que non vai deixar a ninguén indiferente”.