Cultura

– A alcaldesa, Digna Rivas, reivindicou o choco como o “ouro negro” da Enseada de San Simón. A rexedora destaca a “proxección nacional” que acadou esta edición, consolidando a cita como un referente gastronómico en toda Galicia e fóra das nosas fronteiras.

– O pregoeiro confesou o seu asombro pola calidade do produto e o calor da veciñanza: “Levarei a Redondela sempre no corazón”. A festa continúa esta tarde na carpa coa degustación do choco e os concertos da Rondalla de Redondela e o grupo Pa Ti Na Má.

O Concello de Redondela celebrou a XXXIX Festa do Choco, Festa de Interese Turístico de Galicia, pulverizando todos os rexistros de asistencia. A xornada dominical estivo marcada por un ambiente excepcional no Campo da Feira, onde milleiros de persoas se deron cita para gozar do produto estrela da gastronomía local e escoitar o pregón de Miguel Ángel Revilla. O pregoeiro espertou unha gran expectación, e non escatimou en eloxios cara á vila e o seu produto. Durante a súa intervención, Revilla destacou a “calidade” do choco de Redondela e amosouse emocionado pola acollida por parte dos veciños e veciñas, que o acompañaron con agarimo durante toda a fin de semana. “Prométovos que, a partir de hoxe, levarei a Redondela e á súa xente sempre no corazón”, unha confesión que arrancou os aplausos do público, que interrompeu o discurso en varias ocasións para ovacionar ao pregoeiro.

Pola súa banda a alcaldesa de Redondela, Digna Rivas, definiu o choco de Redondela como un símbolo de identidade: “Alá onde imos, chámannos choqueiros e choqueiras, e levámolo con moita honra porque o noso choco é o auténtico tesouro da Enseada”. Tamén ligou a celebración coa historia da Enseada e a Illa de San Simón, declarada Lugar de Memoria Democrática. Lembrou o papel das “madriñas”, mulleres solidarias que axudaron aos presos durante a ditadura, sinalando que “é un acto de xustiza necesario para que as novas xeracións saiban que Redondela é unha vila de solidariedade e dignidade”. A alcaldesa concluíu agradecendo a Revilla o seu papel como “o mellor embaixador do choco de Redondela”. Rivas destaca a “proxección nacional” que acadou esta edición da Festa do Choco, consolidando a cita como un referente gastronómico en toda Galicia e fóra das nosas fronteiras.

Coa carpa de degustación chea de visitantes de toda Galicia e fóra da comunidade, Redondela reafirma con esta 39ª edición o seu liderado como referente gastronómico e cultural.

O histórico líder cántabro, Miguel Ángel Revilla, ofreceu onteunha charla memorable en Redondela ante un auditorio ateigado que colgou o cartel de completo. Acompañado pola alcaldesa, Digna Rivas, Revilla fixo gala do seu carisma nun acto que alternou a reflexión íntima coas anécdotas que provocaron as gargalladas dos asistentes. Aos seus 83 anos, Revilla realizou un fondo repaso da súa biografía, emocionando ao público ao lembrar as súas orixes humildes na localidade cántabra de Salceda. Narrou a dureza da súa infancia e o papel que tivo na súa traxectoria a súa familia. Repasou o seu paso polo Goberno de Cantabria (en dúas etapas entre 2003 e 2023) e anécdotas cos persoeiros aos que tivo ocasión de coñecer.

Pola súa banda, a alcaldesa Digna Rivas agradeceu a visita de Revilla a Redondela, onde hoxe ofreceu o pregón da Festa do Choco. A rexedora destacou a súa xenerosidade “por compartir o seu legado persoal e político”, destacando a súa capacidade para conectar coa xente do común, e ser “un referente” para varias xeracións.

– O Festival Internacional de Títeres celebra a súa 27ª edición do 11 ao 17 de maio, consolidándose como unha das citas máis prestixiosas a nivel nacional e internacional. Durante sete días, as rúas, prazas e auditorios do municipio encheranse de vida con máis de 60 funcións e actividades para públicos de todas as idades.

– A alcaldesa, Digna Rivas, subliña a importancia do festival como unha ferramenta fundamental para a formación cultural das novas xeracións. A rexedora puxo o acento no éxito da campaña escolar, que este ano contará coa participación de preto de 1.500 nenos e nenas de centros educativos do municipio.

A 27ª edición do Festival Internacional de Títeres “Memorial Juanjo Amoedo” foi presentada por Eduardo Rodríguez «Tatán» (presidente de Xente Titiriteira) e Luís Crespo (director do festival), xunto coa alcaldesa de Redondela, Digna Rivas, o deputado de Cultura da Deputación, Jorge Cubela, e Jacobo Sutil, director de Agadic. O festival ofrece máis de 60 funcións que combinan a tradición galega coa vangarda internacional. Compañías de Francia, Arxentina, Italia, Uruguai e Portugal traerán espectáculos premiados, xunto a referentes galegos como os redondeláns Tanxarina, Alakrán ou Troula Animación.

O luns comeza a programación escolar, que Rivas cualificou como a “semente” do festival, destacando que permite rapazada sentir “o amor polo teatro” dende idades temperás e garantir que a cultura sexa accesible para todo o alumnado de Redondela. A alcaldesa lembrou que o festival forma parte do patrimonio “cultural e emocional de Redondela”, destacando o seu carácter interxeracional. Na súa intervención, resaltou que a participación de compañías de prestixio internacional permite que os escolares redondeláns teñan acceso a espectáculos de vangarda sen saír do municipio.

En canto aos espectáculos itinerantes destacan «Os Extintos» do Sindicato de Monstros, unhas marionetas de gran formato, e «Agosinho e Felicidade» de Boca de Cao, dúas marionetas humanas que interactúan co público. Na Pista da Xunqueira atoparemos unha instalación temática interactiva «Os Monicreques» de Galiot Teatre. Un espazo con 16 pequenos teatros de monicreques para que todas as familias poidan usalos. Na praza de Ponteareas poderemos gozar da instalación de xogos de madeira «Un Mar de Xogos».

O programa tamén inclúe a actividade “De flor en flor” ou a fantástica viaxe do invisible, que convida á cidadanía a participar disfrazándose de calquera insecto para celebrar o proceso esencial da polinización. E no Multiusos da Xunqueira podemos gozar coa exposición «Os Monicreques de Kukas», ata o 21 de maio. O clásico Mercadiño Titireiro realizarase os días 16 e 17 de maio na Alameda, con horario de 11:00 a 22:30 horas.

Do mesmo xeito que nas últimas edicións, algunhas das funcións serán con intérprete en lingua de signos. As representacións de sala serán no Multiusos dá Xunqueira cun prezo de 7 € á venda no despacho de billetes do Auditorio (se sobraron da venda anticipada). O resto de programación, representacións en todos os escenarios de rúa e itinerantes son gratuítas.

A representación de Galicia é especialmente potente nesta ocasión. A veterana compañía local Tanxarina encabeza un cartel que inclúe nomes imprescindibles como Monicreques Alakrán, Babaluva, Micromina, Trécola Produccións, Troula Animación e Bico de Toupa. Entre as montaxes máis esperadas figura «A Biblioteca Galáctica contra a IA Fantástica» da compañía redondelá, peza recoñecida nos prestixiosos premios María Casares 2026.