Aquí sí hai quen escriba… Presentación da primeira novela da chapelana Lorena Santervás

Estamos de estrea!
As Bibliotecas Municipais de Redondela, en colaboración cos Amigos das Bibliotecas Municipais de Redondela, van comezar un novo ciclo de actividades.

A esta nova aventura chamámola “Aquí sí hai quen escriba”, pode ser que influídos por certos produtos televisivos que nos arrodean… vai ti saber!

Sexa cal sexa o nome, esta nova andaina consiste en citas periódicas onde presentaremos libros, propostas editoriais e outros proxectos que xurden da creatividade, o esforzo e a sabedoría da nosa veciñanza e… de xente de por acó.

Sábenos bonito ofrecer as bibliotecas como espazo de encontro e como cofre de experiencias, para dar a coñecer a creatividade dos nosos conveciños e conveciñas. Estamos na procura de converter os nosos recintos en lugares de inspiración e intercambio de ideas.

Así que aló imos! Iniciaremos esta experiencia en Chapela. E nada menos que cunha usuaria fiel da biblioteca: Lorena Santervás, que nos vai falar da súa primeira novela: “Mi muerte, el Infierno y Ella”. Unha historia de corte romántico e tinguida de elementos fantásticos.

A cita para esta presentación será o xoves 14 de decembro, ás 20:00 h.

Agardamos moito moitísimo éxito a Lorena con esta novela, inicio dunha triloxía, que xa está a poñer en marcha.

Convidamos a todos os chapeláns, Beretes e mais xente dos arredores que se achegue a arroupar a esta valente escritora.