ES 
GL 
A vindeira semana a Biblioteca Xela Arias contará coa presenza do periodista e escritor Brais Suárez. Con el teremos o pracer de presentar unha sesión de club de lectura aberto, onde nos achegará as súas experiencias como viaxeiro atípico, cronista e observador da actualidade, en lugares como os Balcáns, Europa do Leste e mais a Rusia europea.
Froito das súas vivencias, e do seu especial xeito de acoller e habitar a lonxanía, sacou ao prelo un libro ben interesante e suxestivo. Un saboroso estímulo para aqueles amantes da viaxe, real ou imaxinaria: «Mar branco», publicado por Galaxia.
– Se vos apetece alonxarvos polo mundo sen saír da biblioteca,
– Se vos gusta a literatura de viaxes,
– Se vos apetece curiosear as mil anécdotas destes lugares lonxanos e dispares,
A vosa cita é o mércores 13 de marzo, ás 20:00 h., na Biblioteca Xela Arias de Chapela. Estades todos e todas convidados.
Unha actividade que enmarcamos dentro do ciclo «Aquí sí hai quen escriba», para dar a coñecer o que se está a facer dentro da vida literaria, creativa e editorial da nosa contorna.
Agardámosvos no Piñeiral do Crego!
