Este ano as Bibliotecas Municipais de Redondela festexaremos o 24 de outubro, Día das Bibliotecas, do xeito máis espectacular que se nos ocorre.
Trasladamos a esta data a celebración do 20 aniversario da Biblioteca Xela Arias de Chapela, que levamos conmemorando durante todo o ano, e traemos para este día un evento do máis extraordinario: o concerto do grupo Os Carunchos.
Os Carunchos, lendario grupo de música tradicional con tres décadas de bagaxe, ten un fondo arraigamento na localidade de Chapela. O grupo ven de publicar o seu primeiro libro-disco: “Unha gorxa chea de paxaros”, no que pon música a fermosos poemas do benquerido Manuel María.
A cita terá lugar no Auditorio do Multiúsos Piñeiral do Crego.
A entrada é libre ata completar a capacidade.