Xuventude

A alcaldesa, Digna Rivas, e a concelleira de Xuventude, Iria Vilaboa, visitaron o obradoiro de Fotografía e Vídeo que imparte Cuchi Carreira.

– O Concello de Redondela destaca o grande interese que espertaron as actividades entre a rapazada e o grao de satisfacción dos obradoiros tecnolóxicos, artísticos e musicais celebrados en xullo.

– Novidades coma os cursos de artesanía en coiro e de iniciación a DJ tiveron unha gran acollida. A alcaldesa, Digna Rivas, anima a mozos e mozas a facer “as súas propias achegas con ideas para novos obradoiros que poidamos facer desde o Concello e que respondan ás súas inquedanzas e intereses”.

O Concello de Redondela fixo hoxe un balance moi positivo do programa de lecer e formación ‘Lab Xove’, desenvolvido ao longo de todo o mes de xullo. Esta iniciativa, deseñada especificamente para mozas e mozos maiores de 12 anos, obtivo unha magnífica acollida e, sobre todo, unha valoración moi positiva por parte das persoas participantes, que destacaron a utilidade e o dinamismo dos cursos.

As actividades celebráronse en horario de mañá (de 10:00 a 13:00 horas). O obxectivo foi ofrecer un espazo de encontro, aprendizaxe e ocio seguro durante as vacacións de verán, un obxectivo cumprido con creces segundo os propios asistentes.

A alcaldesa de Redondela, Digna Rivas, amosou a súa satisfacción polo desenvolvemento do programa e sinalou que “o éxito destas xornadas demostra que a mocidade do noso Concello ten inquedanzas e ganas de aprender cando se lle ofrecen alternativas públicas de calidade, saudables e adaptadas aos seus gustos”. A rexedora incidiu en que desde o Goberno local “estamos totalmente abertos ás propostas da propia mocidade para dar resposta ás súas inquedanzas e intereses”, polo que aproveitou para “animalos a propoñer novos cursos e actividades que queiran que se desenvolvan desde o Concello”.

Dentro do programa de actividades, as novidades deste ano foron unha peza clave. Pola súa banda, a concelleira de Infancia e Xuventude, Iria Vilaboa, explicou que “o obradoiro de Artesanía en coiro e o de Iniciación a DJ espertaron un enorme interese e tiveron unha acollida excelente, o que confirma o acerto de introducir novos formatos creativos e musicais na axenda deste verán”.

A axenda do ‘Lab Xove’ completouse con Formación técnica en Edición de vídeo e foto, Innovación tecnolóxica con Ferramentas de IA e Expresión artística con Pintura mural. Para rematar, a concelleira Vilaboa destacou o bo ambiente e o grao de implicación en cada un dos talleres celebrados, afirmando que a gran resposta recibida “impúlsanos a seguir traballando dende a Concellería en novas propostas formativas, artísticas e dixitais de cara aos vindeiros meses”.

– As actividades realizaranse ao longo do mes de xullo con disciplinas como intelixencia artificial, iniciación a DJ, edición audiovisual, pintura mural ou artesanía en coiro. O programa é gratuíto e está dirixido a maiores de 12 anos.

– A alcaldesa, Digna Rivas, destaca que a iniciativa “busca potenciar o talento, a creatividade e o manexo de novas ferramentas tecnolóxicas entre a nosa mocidade”.

O Concello de Redondela pon en marcha o programa ‘Lab Xove Redondela’, unha alternativa de lecer educativa, creativa e tecnolóxica deseñada para a mocidade do municipio durante as vacacións de verán. O proxecto desenvolverase ao longo do vindeiro mes de xullo en horario de mañá, de 10:00 a 13:00 horas. O programa está dirixido a mozos e mozas maiores de 12 anos que queiran explorar novas habilidades artísticas e dixitais. O espazo principal das actividades será o Multiúsos da Xunqueira, aínda que tamén se contemplan outras localizacións.

A alcaldesa de Redondela, Digna Rivas, sinalou que con esta nova programación “ofrecemos un programa alternativo gratuíto, dinámico e moderno onde a mocidade redondelá pode espertar novas vocacións, aprender divertíndose e compartir experiencias”. Rivas incidiu en que “hoxe en día é fundamental que as administracións locais acheguemos ferramentas clave como a Intelixencia Artificial ou a comunicación dixital, sen esquecer nunca a expresión artística directa a través da música, a artesanía ou a pintura”.

A oferta formativa estrutúrase por días da semana cunha ampla variedade de temáticas:

• Luns: Percusión corporal e Iniciación a DJ.

• Martes: Artesanía en coiro.

• Mércores: Edición de vídeo e foto.

• Xoves: Ferramentas de Intelixencia Artificial (IA).

• Venres: Pintura mural e Comunicación dixital.

Inscricións e limitación de prazas

O prazo para apuntarse a estes cursos abre o venres 19 de xuño. Inscricións no rexistro do Concello, de xeito presencial ou na sede electrónica. A adxudicación de prazas realizarase por orde de rexistro ata completar o aforo dispoñible. Co obxectivo de garantir a calidade didáctica de cada obradoiro, os grupos serán reducidos: estableceuse un máximo de 15 persoas e un mínimo de 7 persoas por curso. As solicitudes de inscrición tramitaranse no rexa través das canles habituais habilitadas polo Concello de Redondela.

– O servizo de atención temperá da agrupación de Concellos de Redondela, Soutomaior, Pazos e Fornelos leva tres meses de funcionamento, e atendeu xa a ducias de familias da comarca. Redondela canaliza o groso das solicitudes con 29 casos.

– Hoxe celébrase o Día Nacional da Atención Temperá baixo o lema “Todas as familias e os profesionais unidos/as pola atención temperá”. Coincidindo con este manifesto, o centro redondelán centra os seus esforzos “en escoitar as necesidades de cada fogar para ofrecer ferramentas personalizadas”.

O servizo, situado nas instalacións municipais na rúa Reveriano Soutullo, conmemora hoxe o Día Nacional da Atención Temperá. A alcaldesa, Digna Rivas, e a concelleira de Servizos Sociais e Infancia, Iria Vilaboa, fan un balance moi positivo deste recurso de proximidade. O pasado 12 de marzo comezou a funcionar e desde o Concello valoraron de xeito moi positivo “a excelente acollida comunitaria deste servizo”, que presta tamén atención a familias de Soutomaior, Pazos de Borbén e Fornelos de Montes.

A conmemoración deste ano realízase baixo o lema nacional “Todas as familias e os profesionais unidos/as pola atención temperá”. Coincidindo con este manifesto, desde o centro sinalan que o obxectivo é “escoitar as necesidades das familias” para ofrecer apoio e ferramentas “adaptadas a cada realidade”. Deste xeito, os momentos cotiáns —como o xogo, as rutinas ou a comunicación— convértense en oportunidades clave para o desenvolvemento infantil. Neste obxectivo traballa o equipo multidisciplinar do centro, formado por unha psicóloga, unha logopeda e unha fisioterapeuta pediátrica.

A alcaldesa salienta o impacto directo do centro nos fogares do municipio. “A apertura deste servizo na vila supón un antes e un despois para as familias de Redondela, que agora contan cun apoio público, gratuíto e especializado sen realizar longos desprazamentos”, suliña a rexedora. Rivas engadiu que “ofrecer unha resposta rápida ás crianzas alivia a carga emocional e económica das nais e pais, demostrando que investir en atención temperá é investir no futuro e na calidade de vida da veciñanza”.

O centro rexistrou desde a súa apertura 43 demandas de familias, das cales 26 xa foron atendidas. Redondela encabeza as solicitudes con 29 casos, seguida de Soutomaior con 9, Pazos de Borbén con 5 e Fornelos con 1. O crecemento nas solicitudes de atención foi exponencial desde o inicio da atención directa ás familias no pasado mes de maio.

O servizo, integrado na Rede Galega de Atención Temperá, está cofinanciado pola Unión Europea (Programa FSE+ Galicia 2021-2027).