Cultura

– A iniciativa conta coa participación do Grupo de Teatro ADC Rande e desenvolverase os días 27 de xuño, 25 de xullo e 29 de agosto. Haberá dous pases por xornada, a entrada é de balde pero require inscrición previa.

– A alcaldesa, Digna Rivas, destaca o éxito destas visitas “que combinan a divulgación histórica co talento do tecido asociativo local para facer o noso patrimonio máis accesible e atractivo”.

O Concello de Redondela, a través da Concellería de Turismo, presenta a nova programación de visitas guiadas teatralizadas no Centro de Interpretación da Batalla e Patrimonio Cultural de Rande (Meirande). Esta proposta cultural e turística busca achegar a historia local á veciñanza e visitantes dun xeito dinámico, ameno e rigoroso. As xornadas contarán coa participación do Grupo de Teatro ADC Rande, cuxos actores e actrices serán os encargados de dar vida aos personaxes do relato histórico, recreando os feitos da lendaria batalla e o patrimonio industrial e cultural da zona.

A alcaldesa, Digna Rivas, puxo en valor esta iniciativa sinalando que “o Museo Meirande é un piar fundamental da nosa identidade histórica, e con estas visitas teatralizadas a memoria de Rande está máis viva ca nunca”. A rexedora local subliñou ademais a importancia de colaborar coas entidades do municipio: “É un orgullo contar co talento do Grupo de Teatro ADC Rande. Esta actividade amosa a forza do noso tecido asociativo e cultural”.

As visitas están programadas para os vindeiros sábados 27 de xuño, 25 de xullo e 29 de agosto. Co obxectivo de facilitar a asistencia de público e respectar os límites de aforo do espazo, organizaranse dous pases en cada unha das datas: o primeiro ás 16:30 horas e o segundo ás 18:00 horas. A entrada é de balde, pero debido á capacidade limitada de cada quenda, as persoas interesadas en asistir deberán realizar unha inscrición previa a través do teléfono 986 458 891 ou no enderezo electrónico museomeirande@redondela.gal

Dende o Goberno local convídase a toda a cidadanía e aos visitantes que se acheguen ao municipio durante o verán a participar nestas xornadas únicas para descubrir, en primeira persoa e dun xeito diferente, os segredos e lendas que agocha a historia de Rande.

O Concello de Redondela autorizou máis de 70 fogueiras que arderán a partir desta medianoite para celebrar a tradicional festa de San Xoán.

Oito destas cacharelas están organizadas por centros culturais e asociación veciñais e deportivas. Son abertas ao público e contan con actividades paralelas de animación con música, sardiñada e outras ofertas gastronómicas. Trátase das fogueiras situadas en Cabeiro, Cesantes, Santo Estevo de Negros, Miñoteira (Ventosela), Quintela, Meirande (Rande), Soutoxuste e Tuimil (Viso).

Tamén haberá festa de San Xoán no paseo de Cardona, pero neste caso sen fogueira.

A maiores autorizáronse tamén máis de 60 fogueiras que se prenderán en leiras particulares.

– Tres xeracións da familia do ilustre galeguista —a súa filla Amalia Bóveda, o seu neto Valentín García, e o seu bisneto Antón— participaron nos actos centrais xunto a Joana Montero, muller do escritor e ilustrador Carlos Taboada. A tenente de Alcaldesa, Rita Pérez Táboas, felicitou á comunidade educativa e destacou o papel de Bóveda na defensa da nosa cultura.

– O colexio inaugurou dúas novas instalacións: a Radio Amalia Bóveda e o Espazo sensorial Carlos Taboada. O colexio agasallou ao IES Chapela unha réplica feita por Ángel Barros do cadro “A derradeira lección do mestre” de Castelao. Con este cadro pasan o relevo ao instituto onde o alumnado do CEIP Alexandre Bóveda fará os estudos de secundaria.

O CEIP de Angorén celebrou onte o 123º aniversario do nacemento de Alexandre Bóveda, que dá nome ao centro. O colexio viviu unha emotiva xornada de celebración e homenaxes. O acto central arrincou cunha recepción musical á que asistiron tres xeracións directas do intelectual galeguista: Amalia Bóveda (filla), Valentín García (neto) e Antón (bisneto). A representación do Concello correspondeu á tenente de alcaldesa, Rita Pérez Táboas e ao concelleiro de Ensino, Alberto Álvarez. Tamén participou o director territorial de Educación, César Pérez.

Noemí Moreira, directora do centro, sinalou que este curso inspiráronse na obra de Castelao A derradeira lección do mestre, dedicada a Bóveda, para construír unha identidade baseada na memoria compartida e rendendo tamén homenaxe aos artistas Carlos Taboada e Ángel Barros polo seu compromiso coa cultura e coa infancia.

Rita Pérez felicitou á comunidade educativa e destacou o papel de Bóveda na defensa da nosa cultura, lembrou que a súa figura demostra que “a violencia non leva a ningures” e tivo palabras de recoñecemento para os homenaxeados Carlos Taboada e o pintor Ángel Barros. Pérez Táboas sinalou tamén que xa está en marcha o proxecto do futuro Museo Municipal de Redondela que acollerá o legado artístico de Barros.

‘A lección continúa’. A proposta artística realizada polo alumnado de 6º de primaria levou por lema “A lección continúa”, inspirada no cadro de Castelao. Na emotiva peza poética e simbólica, afirmaron que as leccións seguen cada día nas escolas e na comunidade, que pode transformarse o mundo a través da arte, a palabra e o coidado aos demais. “Porque hai memorias que non se gardan. Entréganse. De man en man. A lección continúa.” Unha réplica do cadro de Castelao, realizada por Ángel Barros para o CEIP Alexandre Bóveda, foi entregada como agasallo ao IES Chapela. Aldán Santamarina, coordinador do Equipo de Dinamización Lingüística do instituto, foi o encargado de recoller a obra. Con este cadro pasan o relevo ao instituto onde o alumnado de Angorén fará os estudos de secundaria.

Novas dotacións escolares e homenaxe a Carlos Taboada. Tras o acto, inauguráronse dous novos espazos: a Radio Amalia Bóveda, unha nova emisora escolar do centro, e o Espazo Carlos Taboada, un aula sensorial en recoñecemento ao ilustrador de Polo correo do vento autor do mural da entrada da escola.