Xuventude

Digna Rivas e Antonio Cabaleiro na presentación coa presidenta co CAR, Ana Romasanta, e os atletas Andrés Corugeira e Gael Couñago.

– Centos de deportistas de todas as idades daranse cita o sábado 12 de setembro en Redondela coa VI Carreira Popular Infantil e a V Contrarreloxo por equipos. As dúas probas, organizadas polo Concello en colaboración co club de atletismo CAR, comezan a partir das 18.00 horas coa proba infantil e ás 20.00 coa contrarreloxo.

– Tanto o Concello como o club animan á cidadanía de todas as idades a sumarse a este evento para gozar dunha xornada de deporte e convivencia. As inscricións están abertas ata o día 9 de setembro as 20:00 horas e realízanse a través de Cronotec.

A alcaldesa de Redondela, Digna Rivas, e o concelleiro de Deportes, Antonio Cabaleiro, presentaron esta cita deportiva que coincide co 14º aniversario do CAR. Por parte do club participaron a presidenta, Ana Romasanta. E os atletas do CAR Andrés Corugeira e Gael Couñago. Tanto desde o Concello como desde o club animan aos amantes do atletismo de todas as idades a sumarse a este evento para gozar dunha xornada de deporte e convivencia.

Esta edición da Carreira Popular Infantil está dirixida a nenos e nenas nados entre 2011 e 2024. A rapazada terá que percorrer diferentes distancias segundo as súas idades. Así, a distancia da carreira será para os máis pequenos de 100 metros até os 1.500 metros para os maiores. Tamén se celebra unha Carreira Inclusiva, con categoría única, para persoas con diversidade funcional, sen distinción de idade. As probas comezarán a partir das 18.00 horas na rúa Alfonso XII. A meta estará situada na mesma rúa, fronte á Casa do Concello. Nestas carreiras a inscrición é de balde. A oito días de que peche o prezo xa hai case un cento de participantes.

A Carreira Contrarreloxo por Equipos comezará ás 20.00 horas. Os equipos deberán estar formadas por entre 4 e 6 compoñentes. No caso dos equipos mixtos deberán ser do outro xénero un mínimo de 2 compoñentes. O percorrido terá unha distancia de 5.000 metros que comezará no centro da vila e rematará diante do Concello, onde estará situada a meta. A inscrición inclúe os gastos de xestión e o prezo é de 8,50 euros. O prazo de inscrición con prezo reducido ampliouse ata o venres 4 de setembro, cun custe de 6,50 euros.

INSCRICIÓNS EN CRONOTEC

Establécense premios para os tres primeiros equipos clasificados en cada unha das categorías. O primeiro recibirá unha cesta de produtos gourmet galegos valorada en 150 € e un premio económico de 100 €. O segundo equipo levará unha cesta valorada en 100 € e un vale de 60 € para material deportivo. O terceiro clasificado recibirá unha cesta de produtos gourmet valorada en 75 € e un vale de 40 € para material deportivo.

O evento conta co patrocinio de Rodavigo, Aqualia, Grupo Lirón, Decoraciones Barciela, Talleres Ponteseca, Edusportia e Grupo Damm.

Digna Rivas e Iria Vilaboa xunto á Policía Nacional de Participación Cidadá que visita os campamentos 

– Rapazada de 3 a 12 anos participa nestas actividades nas diferentes parroquias. A alcaldesa, Digna Rivas, sinala que os campamentos municipais ofrecen ás familias “un espazo de lecer seguro, educativo e de calidade para nenos e nenas durante as vacacións escolares, tanto no mes de xullo como en agosto”.

O Concello de Redondela fai un balance moi positivo do Programa Municipal de Conciliación de Verán durante o pasado mes de xullo. O servizo municipal pechou o seu primeiro tramo cun gran éxito de participación. A alcaldesa, Digna Rivas, sinala que esta actividade ofrece ás familias “un espazo de lecer seguro, educativo e de calidade para os nenos e nenas do municipio durante as vacacións escolares”.

O campamento de conciliación non para e continúa activo durante todo este mes de agosto. A ampliación do servizo foi impulsada polo Goberno de Rivas, xa que en mandatos anteriores os campamentos estivais limitábanse ao mes de xullo. Con esta medida, ofrécense 180 prazas adicionais no mes de agosto para dar unha cobertura total ás familias e facilitar a conciliación os dous meses de vacacións. En conxunto, o Concello ofrece 480 prazas nos campamentos de verán. Rivas, explica que o Concello “aposta por achegar os servizos a toda a veciñanza, tanto na vila como nas parroquias, para facilitar o acceso aos campamentos e reducir os desprazamentos das familias”. Pola súa banda, a concelleira de Igualdade, Iria Vilaboa, destaca que o seu departamento ofrece un servizo “que favorece a conciliación de responsabilidades familiares e laborais, ao tempo que permite a nenos e nenas participar en actividades lúdicas”.

A rapazada que participa nos campamentos recibiu a visita do equipo de Partición Cidadá da Policía Nacional da comisaría Vigo-Redondela. Os axentes imparten aos nenos e nenas charlas para previr o acoso escolar, danlles pautas sobre seguridade e amósanlles os vehículos policiais, as sirenas e o equipamento básico.

A alcaldesa, Digna Rivas, e a concelleira de Xuventude, Iria Vilaboa, visitaron o obradoiro de Fotografía e Vídeo que imparte Cuchi Carreira.

– O Concello de Redondela destaca o grande interese que espertaron as actividades entre a rapazada e o grao de satisfacción dos obradoiros tecnolóxicos, artísticos e musicais celebrados en xullo.

– Novidades coma os cursos de artesanía en coiro e de iniciación a DJ tiveron unha gran acollida. A alcaldesa, Digna Rivas, anima a mozos e mozas a facer “as súas propias achegas con ideas para novos obradoiros que poidamos facer desde o Concello e que respondan ás súas inquedanzas e intereses”.

O Concello de Redondela fixo hoxe un balance moi positivo do programa de lecer e formación ‘Lab Xove’, desenvolvido ao longo de todo o mes de xullo. Esta iniciativa, deseñada especificamente para mozas e mozos maiores de 12 anos, obtivo unha magnífica acollida e, sobre todo, unha valoración moi positiva por parte das persoas participantes, que destacaron a utilidade e o dinamismo dos cursos.

As actividades celebráronse en horario de mañá (de 10:00 a 13:00 horas). O obxectivo foi ofrecer un espazo de encontro, aprendizaxe e ocio seguro durante as vacacións de verán, un obxectivo cumprido con creces segundo os propios asistentes.

A alcaldesa de Redondela, Digna Rivas, amosou a súa satisfacción polo desenvolvemento do programa e sinalou que “o éxito destas xornadas demostra que a mocidade do noso Concello ten inquedanzas e ganas de aprender cando se lle ofrecen alternativas públicas de calidade, saudables e adaptadas aos seus gustos”. A rexedora incidiu en que desde o Goberno local “estamos totalmente abertos ás propostas da propia mocidade para dar resposta ás súas inquedanzas e intereses”, polo que aproveitou para “animalos a propoñer novos cursos e actividades que queiran que se desenvolvan desde o Concello”.

Dentro do programa de actividades, as novidades deste ano foron unha peza clave. Pola súa banda, a concelleira de Infancia e Xuventude, Iria Vilaboa, explicou que “o obradoiro de Artesanía en coiro e o de Iniciación a DJ espertaron un enorme interese e tiveron unha acollida excelente, o que confirma o acerto de introducir novos formatos creativos e musicais na axenda deste verán”.

A axenda do ‘Lab Xove’ completouse con Formación técnica en Edición de vídeo e foto, Innovación tecnolóxica con Ferramentas de IA e Expresión artística con Pintura mural. Para rematar, a concelleira Vilaboa destacou o bo ambiente e o grao de implicación en cada un dos talleres celebrados, afirmando que a gran resposta recibida “impúlsanos a seguir traballando dende a Concellería en novas propostas formativas, artísticas e dixitais de cara aos vindeiros meses”.