Medio Ambiente

O Concello de Redondela autorizou máis de 70 fogueiras que arderán a partir desta medianoite para celebrar a tradicional festa de San Xoán.

Oito destas cacharelas están organizadas por centros culturais e asociación veciñais e deportivas. Son abertas ao público e contan con actividades paralelas de animación con música, sardiñada e outras ofertas gastronómicas. Trátase das fogueiras situadas en Cabeiro, Cesantes, Santo Estevo de Negros, Miñoteira (Ventosela), Quintela, Meirande (Rande), Soutoxuste e Tuimil (Viso).

Tamén haberá festa de San Xoán no paseo de Cardona, pero neste caso sen fogueira.

A maiores autorizáronse tamén máis de 60 fogueiras que se prenderán en leiras particulares.

– A tala e limpeza subsidiaria da masa forestal comezou esta semana na zona da Murada, en Rande. Os traballos continuarán nos vindeiros días ata completar un total de 27 parcelas noutros puntos da parroquia de Cedeira, así como en Chapela, Vilar e Trasmañó. Os traballos realízanse a través do convenio que o Concello mantén con Seaga, e afectan a case 30.000 metros cadrados.

– A alcaldesa, Digna Rivas, subliñou que estas accións son ferramentas imprescindibles para eliminar riscos de incendios en puntos sensibles do municipio. A resolución municipal inclúe o comiso inmediato da madeira extraída e a repercusión de todos os custos económicos aos propietarios.

O Concello de Redondela, baixo a dirección da Concellería de Medio Ambiente, comezou de forma efectiva a execución subsidiaria para a limpeza e xestión de biomasa nun total de 27 parcelas de titularidade privada en diferentes parroquias do municipio. Os traballos de tala e roza realízanse a través do convenio subscrito con Seaga (Empresa Pública de Servizos Agrarios Galegos). As actuacións comezaron esta semana na zona da Murada, en Rande, logo dos atrasos acumulados pola empresa pública desde os anos 2024 e 2025.

En total, a intervención faise sobre unha superficie forestal de 28.500 metros cadrados. Os traballos céntranse en espazos estratéxicos e vulnerables situados dentro das franxas secundarias de protección tanto de Chapela como de Cedeira, Vilar de Infesta e Trasmañó.

Garantía de seguridade e prevención de riscos

A limpeza subsidiaria realízase tras rematar o prazo concedido aos propietarios para cumprir con esta obriga. A alcaldesa, Digna Rivas, explica que se trata dun acto de responsabilidade: “A nosa prioridade absoluta é protexer as vidas e os bens dos veciños e veciñas de Redondela. Dende o Concello esgotamos as vías previas e asumimos a execución a través do Seaga para evitar o risco de incendios en puntos sensibles”. Cumprindo a normativa vixente comísase toda a madeira de especies pirófitas (como eucaliptos e piñeiros) que sexa retirada das parcelas, amais de tramitarse as correspondentes sancións.

O concelleiro de Medio Ambiente, Alberto Álvarez, explicou que a folla de ruta está deseñada para optimizar os recursos: “Os traballos comezan nos lugares onde a proximidade da maleza ás vivendas xera máis risco, pero o operativo non vai parar e as brigadas continuarán traballando polo resto de parcelas catalogadas”.

Desde o Concello solicitouse xa ao Seaga a limpeza doutro lote de parcelas correspondentes ao convenio deste ano 2026.

A parroquia de Reboreda foi incluída no Plan de Prevención e Defensa contra Incendios Forestais de Galicia (Pladiga) como zona prioritaria, despois dos graves incendios dos últimos anos. Os propietarios de terreos que estean situados a 50 metros ao redor de vivendas e núcleos de poboación poden solicitar o servizo de roza á empresa pública Seaga cunha tarifa bonificada. O trámite pode realizarse a través do Concello.

– A campaña “Espazos sen Fume” está impulsada pola Asociación Española contra o Cancro. Redondela súmase con dous céntricos espazos por iniciativa do grupo de traballo en Saúde Infanto-Xuvenil da Mesa Local de Saúde. Ontesinalizáronse oficialmente como “espazos libres de fume” o Paseo da Xunqueira e a Alameda de Castelao.

– Esta campaña busca promover unha vida libre de fume que protexa, sobre todo, á poboación infanto-xuvenil e desnormalizar o hábito de fumar en espazos públicos de convivencia. Os espazos escollidos nunha votación popular foron propostos polo alumnado dos institutos.

No marco do Día Mundial sen Tabaco, que se conmemora cada 31 de maio, o Concello de Redondela adheriuse á campaña ‘Espazos sen Fume’, impulsada pola Asociación Española Contra o Cancro, co obxectivo de fomentar hábitos de vida saudables e protexer á poboación, especialmente aos menores, da exposición ao fume do tabaco en espazos públicos. A iniciativa xurdiu no grupo de traballo en Saúde Infanto-Xuvenil da Mesa Local de Saúde. Os espazos sinalizados foron seleccionados mediante un proceso participativo, co obxectivo de implicar á cidadanía na elección de contornas máis saudables. Foi o alumnado dos institutos o que propuxo as posibles localizacións, que posteriormente se someteron a votación: o Paseo de Arealonga, proposto polo alumnado do IES Chapela; A Xunqueira, proposta do alumnado do Illa de San Simón; e A Xunqueira xunto coa Alameda de Castelao, proposta do IES Mendiño, sendo finalmente os espazos seleccionados o Paseo da Xunqueira e a Alameda de Castelao.

Ao acto de sinalización asistiron Patricia López, técnica de promoción da saúde da Asociación Española Contra o Cancro xunto a Amparo Alonso e Fani Daviña, presidenta e voluntaria da sede local da entidade en Redondela; xunto coa alcaldesa de Redondela, Digna Rivas e o concelleiro de Medio Ambiente e Saúde, Alberto Álvarez. Asistiron tamén a este acto: Iria Martínez, responsable da Rede Galega de Promoción da Saúde na Área Sanitaria de Vigo, alumando do IES Mendiño e integrantes da Asociación Lenda, que forman parte da Mesa Local de Saúde.

Patricia López sinala que “a creación destes Espazos sen Fume é un paso fundamental para protexer a poboación do impacto nocivo do tabaco e o vapeo e axuda a desnormalizar un hábito que segue a ser a principal causa evitable de cancro do mundo.” O obxectivo é fomentar unha vida libre de fume que protexa sobre todo á poboación infanto-xuvenil, desnormalizar o hábito de fumar en espazos convivenciais públicos reforzando o papel modélico positivo dos adultos en relación co consumo de tabaco e incentivar o abandono do hábito tabáquico e apoiar no proceso. Todo isto, co obxectivo final de conseguir que, no ano 2030, en liña coa Unión Europea, haxa a primeira xeración libre do fume do tabaco.

O abordaxe do tabaquismo na poboación xuvenil constitúe unha das prioridades estratéxicas da Asociación. Por iso, “queremos agradecer ao Concello de Redondela pola sua implicación e compromiso coa saúde pública, especialmente cos colectivos máis vulnerable como a poboación infanto-xuvenil, axudándonos a conseguir unha xeración libre de fume.”, afirman desde a entidade. Con esta adhesión, a Asociación Española Contra o Cancro e o Concello de Redondela unen esforzos para promover hábitos de vida saudables e protexer á cidadanía, especialmente aos menores, fronte á exposición ao fume do tabaco. Ambas entidades reafirman así o seu compromiso coa prevención de enfermidades e o impulso de contornas máis saudables para toda a poboación.

Pola súa banda, desde o Concello de Redondela, a alcaldesa destacou o firme compromiso do Concello co benestar público e coa educación en valores saudables: “Non se trata de prohibir, senón de concienciar, educar e, sobre todo, protexer á nosa infancia e mocidade”. Rivas quixo agradecer tamén a implicación directa da comunidade escolar neste fito: “É un orgullo ver como as nosas mozas e mozos foron os motores desta iniciativa a través das súas propostas e votacións. O Paseo da Xunqueira e a Alameda son espazos de xogo e convivencia, e desde hoxe son tamén un símbolo do noso compromiso colectivo contra o tabaquismo”.

Máis espazos sen fume, menos tabaquismo

O fume exhalado por un fumador supón unha mestura complexa de compoñentes entre os que se atopan substancias como a nicotina ou o monóxido de carbono e outros carcinóxenos. Non existe un nivel seguro de exposición ao fume ambiental do tabaco, xa que a poboación non percibe o risco de desenvolver cancro cando se inhala este fume tóxico. O tabaco produce cancro tanto nas persoas que fuman como nas que respiran o fume do tabaco doutras, xa que está demostrado que este fume contén máis de 70 substancias canceríxenas. Dos 8 millóns de persoas que falecen ao ano a causa do tabaco, 1 millón nunca fumou, e 65.000 son menores.