Medio Ambiente

Imaxe dun dos roteiros anteriores.

– A primeira saída será este venres, 4 de setembro, co itinerario sobre a ‘Flora e Fauna de Cabeiro’. As actividades deste mes inclúen paseos nocturnos, rutas fluviais, e observación de aves, entre outras alternativas.

-Os concelleiros Rita Pérez e Roberto Villar convidan á veciñanza a participar nestas actividades “para coñecer o noso patrimonio e comprender o valor da nosa historia e riqueza natural”.

O Concello de Redondela presenta o calendario de “Roteiros Ambientais e Culturais” para o mes de setembro. Esta iniciativa, coordinada conxuntamente polas áreas de Turismo e Cultura e de Infraestruturas e Sostibilidade, ten como obxectivo dinamizar o turismo de proximidade e concienciar sobre o valor ecolóxico, histórico e paisaxístico do municipio. Todas as experiencias son guiadas e gratuítas, agás a ruta en kaiak, que conta cun prezo reducido.

O programa arrinca este mesmo venres, 4 de setembro, cunha andaina centrada na Flora e Fauna de Cabeiro, que se desenvolverá polos Montes de Cabeiro en horario de 19:00 a 21:00 horas. Esta será a primeira dunha serie de propostas deseñadas para conectar co territorio e descubrir de preto a riqueza natural local.

A concelleira de Turismo e Cultura, Rita Pérez, destacou a importancia de abrir estas actividades tanto á veciñanza coma aos visitantes: “Queremos que Redondela sexa un referente de turismo cultural e de experiencias. Este programa permite poñer en valor o noso patrimonio inmaterial, as nosas lendas e historia, combinando o lecer cunha aprendizaxe activa e accesible para todos os públicos”. Pola súa banda, o edil de Sostibilidade, Roberto Villar, puxo o foco no respecto polo medio ambiente e o descubrimento dos ecosistemas locais: “Estes roteiros son unha ferramenta perfecta para concienciar sobre a protección da nosa biodiversidade. Desde os paseos fluviais ata a observación de aves buscamos que a xente sinta o orgullo de coidar a nosa contorna natural, cun modelo de lecer sostible e saudable”. As seguintes saídas son:

• Sábado 5: Paseo nocturno “O Río Maceiras” (21:00 – 23:00 h). De balde.

• Domingo 6: Ruta ambiental “O Bosque do Río Fondón” (10:00 – 13:00 h). De balde.

• Domingo 6: Kaiak turístico á Portela (10:30 – 12:30 h). Prezo de 20 € por persoa.

• Sábado 12: Paseo nocturno “A Punta de Cesantes” (20:30 – 23:00 h). De balde.

• Domingo 13: Ruta ambiental “O Río Pexegueiro” (Ruta curta, 10:00 – 13:00 h). De balde.

• Venres 18: Observación de Aves Limícolas, na Senda da Portela (16:00 – 18:00 h). De balde.

• Domingo 27: Ruta ambiental “Os Montes de Ventosela” (17:30 – 20:30 h). De balde.

Información e reservas. Reserva previa na Oficina de Turismo, rúa Isidoro Queimaliños, no teléfono 986 401 713 ou enviando un correo electrónico a turismo@redondela.gal.

O concelleiro Alberto Álvarez e a educadora Débora González con usuarios de Lenda que participan no programa.

– A campaña pioneira da concellería de Medio Ambiente, Lenda e Amorim Cork reúne preto de 100 quilos de tapóns de cortiza grazas á implicación da hostalaría local. Desde o Concello faise un chamamento á cidadanía e aos negocios para seguir sumando apoios.

O Concello de Redondela, a través da Concellería de Medio Ambiente, fai un balance moi positivo do primeiro ano de funcionamento de ‘Re-CORTIZA’, a campaña pioneira en Galicia para a recollida e reciclaxe de tapóns de cortiza. Desde a asociación Lenda, que recolle e clasifica as rollas das botellas, sinalan que reuniron xa preto de 100 quilos de cortiza, o que equivale a máis de 22.000 tapóns retirados do lixo común. Este proxecto pecha así seu primeiro ano cun dobre balance positivo: o beneficio social, co protagonismo da asociación redondelá Lenda, e o proveito ambiental.

Terapia ocupacional e inclusión da asociación Lenda

O proxecto converteuse nunha ferramenta de integración e visibilidade para as persoas usuarias do Centro de Rehabilitación Psicosocial e Laboral da asociación de saúde mental Lenda. Elas so as encargadas de recoller de xeito periódico os tapóns de cortiza nos bares e restaurantes adheridos para logo clasificalos e almacenalos. Esta tarefa proporciónalles unha rutina laboral, fomenta o traballo en equipo e mellora a súa autonomía. Ademais, en virtude do acordo acadado con empresa Amorim Cork, a empresa remunerará economicamente a Lenda polos quilos de cortiza entregados, un retorno económico directo que se investirá en mellorar os programas sociais e terapéuticos da entidade redondelá.

Economía circular e redución de residuos

No aspecto medioambiental, ‘Re-CORTIZA’ cumpriu o obxectivo de evitar que este volume de residuos rematase nos vertedoiros, transformándoo nun recurso de gran valor. A implicación dos hostaleiros de Redondela permitiu canalizar a cortiza cara á economía circular. Agora, grazas á empresa Amorim Cork, este material natural terá unha segunda vida útil en sectores punteiros da construción como illamento e revestimento, para a fabricación de compoñentes aeronáuticos, material deportivo ou artesanía.

Chamamento á hostalaría e veciñanza

O concelleiro de Medio Ambiente, Alberto Álvarez, amosouse moi satisfeito con este dobre impacto: “Cando iniciamos ‘Re-CORTIZA’ fixemos un chamamento á hostalaría porque é onde máis se xera este residuo. Os datos constatan que a resposta foi moi positiva. O proxecto permite reducir residuos e, o máis importante, ofrece unha alternativa ocupacional e terapéutica de calidade no día a día ás persoas de Lenda”. Tras este primeiro ano, o Concello de Redondela quere consolidar o proxecto, polo que fai un chamamento a toda a cidadanía e, de xeito moi especial, aos establecementos de hostalaría que aínda non participan para que se sumen a este proxecto de economía circular. O obxectivo é seguir medrando e estendendo esta rede sostible por todo o municipio.

Para os locais comerciais o proceso é totalmente de balde e moi sinxelo, tan só teñen que contactar co Concello de Redondela ou directamente coa Asociación Lenda. O persoal do proxecto achegarase ao local para deixarlles un colector de cartón específico da campaña. Os hostaleiros só teñen que gardar aí os tapóns de cortiza das botellas. Cando o colector estea cheo, as persoas de Lenda pasarán de xeito periódico a recollelo e baleiralo.

Dende o Goberno local animan tamén á veciñanza a colaborar a nivel particular depositando as rollas de cortiza nos colectores que poden atopar en diferentes edificios municipais como a Casa do Concello, os Multiúsos da Xunqueira e Piñeiral do Crego e as Prazas de Abastos de Redondela e Chapela.

Unha das reunións do equipo de traballo co concelleiro de Medio Ambiente, Alberto Álvarez.

– A alianza entre o marisqueo a pé, a investigación científica internacional e a creación artística consolídase como un referente de cooperación para a sector do mar. O Concello difunde os importantes avances remitidos pola coordinación do proxecto, que está a deseñar unha narrativa sostible para a Enseada de San Simón de cara ao ano 2040. As próximas actividades realizaranse en outono.

O Concello de Redondela, que colabora no proxecto “Mariscando conCiencias para o Futuro”, fai un balance “moi positivo” desta da iniciativa coordinada por Cidadanía S. Coop. Galega e da que participa tamén a Universidade de Vigo, AMARTURMAR e Artelixo. Logo duns meses de intenso intenso traballo “consolidáronse alianzas para imaxinar un horizonte de sostibilidade e progreso para a Enseada de San Simón nas vindeiras décadas”. Ao longo deste período, o proxecto acadou un notable éxito de participación cunha xornada internacional sobre a pesca artesanal no mundo, analizando con detalle os modelos profesionais de México e Xapón.

Colaboración entre mariscadoras e científicas

O proxecto consolidouse como un espazo de referencia para a transferencia de coñecemento grazas á implicación activa de investigadoras de prestixio do Centro de Investigacións Mariñas (CIMA), do Future Oceans Lab da Universidade de Vigo e do grupo Mar Social do CSIC. As expertas compartiron os resultados dos seus estudos sobre sostibilidade e os mecanismos de adaptación do sector pesqueiro fronte ao cambio climático, ofrecendo ideas replicables moi valiosas para o contexto local. Un dos maiores logros destas xornadas foi “a perfecta sintonía e colaboración creada entre o colectivo de mariscadoras a pé de Redondela e o ámbito das ciencias mariñas”. A organización cualifica estes resultados como “altamente satisfactorios” e anuncian que a súa presentación detallada terá lugar xusto á volta do verán.

Arte e danza para un litoral sostible

No eido cultural, o balance tamén avanza a moi bo ritmo. A organización compartiu as primeiras imaxes do proceso de creación dunha peza de danza vinculada ao proxecto, unha proposta artística cargada de ilusión que continúa en construción e que se presentará oficialmente o vindeiro mes de outubro.

Desde o Concello de Redondela lémbrase que “Mariscando conCiencias para o Futuro” é posible grazas ao financiamento da Fundación Daniel e Nina Carasso, a través da súa liña “Arte Cidadá: compoñendo saberes para imaxinar e construír futuros sostibles”. O goberno municipal reitera os seus parabéns á organización polos magníficos resultados e reafirma o seu compromiso total para seguir apoiando esta iniciativa estratéxica de cara ao vindeiro outono.