Medio Ambiente

– A alcaldesa Digna Rivas destaca que co PAMIN “Redondela conta cunha folla de ruta baseada en datos técnicos e coordinada para protexer as vidas e os bens da veciñanza en caso de asolagamentos”. Sinala a rexedora que, malia non estar obrigados a facelo ao municipio en “risco medio”, o Goberno local elaborouno “por responsabilidade”.

– O plan recolle os riscos vinculados ao Rego de Chapela, o Río Fondón, o Río Pexegueiro, o eixo Cabeiro-Alvedosa e a zona costeira de Chapela. O documento xa conta co aval e a homologación favorable da Comisión de Protección Civil da Xunta. Unha vez aprobado inicialmente, o plan someterase a exposición pública para presentar posibles reclamacións ou suxestións antes da aprobación definitiva.

O Pleno do Concello de Redondela deste mes aprobou inicialmente o seu Plan de Actuación Municipal fronte ao Risco de Inundacións (PAMIN). A alcaldesa, Digna Rivas, explica que o municipio ten a consideración de “risco medio” e non existir a obriga de facer este plan, pero que o Goberno local elaborouno “por responsabilidade para revir riscos”. O documento, que saíu adiante co voto favorable de todos os grupos da Corporación agás o BNG, supón dotar ao municipio dunha ferramenta imprescindible de prevención, planificación e seguridade para anticiparse e coordinar a resposta pública ante calquera emerxencia por asolagamento.

Rivas amosou a súa satisfacción polo respaldo acadado no Pleno e suliñou o salto de calidade que supón o plan para o municipio: “Este Goberno asume a súa responsabilidade coa seguridade da veciñanza. Co PAMIN contamon cunha folla elaborada en base a informes técnicos e coordinada co 112 Galicia que protexerá o máis importante: as vidas e os bens dos veciños e veciñas”. Rivas incidiu en que o cambio climático esixe respostas firmes e anticipación: “Os episodios de choivas intensas e as afeccións das mareas son unha realidade no noso concello. Non podemos evitar que chova, pero si debemos garantir que toda a estrutura municipal, Policía Local, servizos técnicos e emerxencias, saiba que facer e como actuar dende o primeiro minuto en que se active unha alerta”.

Un documento xa homologado pola Xunta

Durante o debate plenario, a concelleira de Seguridade e Interior, Rita Pérez, rexeitou as críticas partidistas e recalcou que o PAMIN chega ao Pleno coas máximas garantías e un control externo exhaustivo xa superado. O documento responde a un requirimento da Dirección Xeral de Emerxencias e Interior do 28 de marzo de 2025 e a Comisión Técnica Permanente da Comisión Galega de Protección Civil acordou favorablemente a súa homologación oficial o pasado 10 de xullo de 2026. “Non estamos enviando o documento á Xunta para ver se é correcto, a administración competente xa o revisou e deulle o seu visto e prace definitivo”, defendeu Pérez Táboas. A edil pediu altura de miras: “Ante unha inundación a auga non pregunta quen goberna nin a quen vota cada veciño”.

Planificación sobre a realidade local

O PAMIN analiza de xeito específico o territorio de Redondela para activar de forma automática as fases de prealerta, alerta ou emerxencia en función de parámetros meteorolóxicos e hidrolóxicos. O plan recolle os riscos vinculados ao Rego de Chapela, o Río Fondón, o Río Pexegueiro, o eixo Cabeiro-Alvedosa e a zona costeira da Ría de Vigo en Chapela, determinando con precisión que autoridades dirixen a emerxencia, que medios se mobilizan e de que maneira se alerta á poboación. Así mesmo, prevé a plena integración dos recursos autonómicos do INUNGAL se a capacidade municipal fose superada.

Tras recibir esta aprobación inicial do Pleno, o Plan de Actuación Municipal someterase a un período de exposición pública mediante o correspondente anuncio no Boletín Oficial da Provincia (BOP). A veciñanza, entidades e colectivos sociais poderán consultar o documento técnico e presentar as reclamacións ou suxestións que estimen oportunas antes da súa aprobación definitiva.

– O concelleiro de Medio Ambiente e Saúde, Alberto Álvarez, recolleu o diploma que acredita que a totalidade dos areais do municipio están libres de fume. O recoñecemento sitúa a Redondela entre os 13 concellos da provincia de Pontevedra que acadan a máxima distinción de saúde pública e sustentabilidade.

O Concello de Redondela volve situarse na vangarda da protección ambiental e do coidado da saúde pública en Galicia. O municipio revalidou este ano a Medalla de Ouro da Rede Galega de Praias sen Fume, un distintivo que certifica que o 100% dos areais do termo municipal son espazos libres de tabaco e dispositivos electrónicos de vapeo.

O concelleiro de Medio Ambiente e Saúde, Alberto Álvarez, foi o encargado de recoller este diploma especial nun acto oficial organizado pola Consellería de Sanidade da Xunta de Galicia. Durante o evento, presidido polo conselleiro Antonio Gómez Caamaño, puxose en valor o esforzo de Redondela, que forma parte do selecto grupo de 13 concellos da provincia de Pontevedra que conseguiron blindar toda a súa costa fronte ao fume.

Coa consecución da Medalla de Ouro, o Goberno local consolida unha estratexia que non só busca protexer a saúde da veciñanza e dos visitantes fronte ao tabaquismo pasivo, senón tamén evitar a contaminación por cabichas, un dos residuos máis habituais e prexudiciais para os ecosistemas mariños.

Máis alá dos areais: Paseo da Xunqueira e Alameda Castelao libres de fume.

A estratexia de protección do Concello de Redondela esténdese moito máis alá dos areais e ten a súa orixe no traballo de participación comunitaria. Alberto Álvarez quixo destacar que a ampliación das zonas libres de tabaco na contorna urbana foi unha iniciativa impulsada a través da Mesa Local de Saúde, o órgano que canaliza as propostas de benestar do municipio. Grazas ao impulso desta Mesa, e en estreita colaboración coa Asociación Española Contra o Cancro (AECC), articulouse a campaña para declarar o Paseo da Xunqueira e a Alameda de Castelao como novos «Espazos sen Fume». Esta proposta sumou ademais a implicación activa do alumnado dos institutos locais mediante un proceso de votación popular. Estas dúas emblemáticas zonas de lecer contan xa coa sinalización correspondente para erradicar o tabaco tradicional e os vapeadores, co obxectivo prioritario de protexer á poboación infantil e xuvenil e evitar que se normalicen hábitos nocivos nos lugares de convivencia diaria.

Imaxe dun dos roteiros anteriores.

– A primeira saída será este venres, 4 de setembro, co itinerario sobre a ‘Flora e Fauna de Cabeiro’. As actividades deste mes inclúen paseos nocturnos, rutas fluviais, e observación de aves, entre outras alternativas.

-Os concelleiros Rita Pérez e Roberto Villar convidan á veciñanza a participar nestas actividades “para coñecer o noso patrimonio e comprender o valor da nosa historia e riqueza natural”.

O Concello de Redondela presenta o calendario de “Roteiros Ambientais e Culturais” para o mes de setembro. Esta iniciativa, coordinada conxuntamente polas áreas de Turismo e Cultura e de Infraestruturas e Sostibilidade, ten como obxectivo dinamizar o turismo de proximidade e concienciar sobre o valor ecolóxico, histórico e paisaxístico do municipio. Todas as experiencias son guiadas e gratuítas, agás a ruta en kaiak, que conta cun prezo reducido.

O programa arrinca este mesmo venres, 4 de setembro, cunha andaina centrada na Flora e Fauna de Cabeiro, que se desenvolverá polos Montes de Cabeiro en horario de 19:00 a 21:00 horas. Esta será a primeira dunha serie de propostas deseñadas para conectar co territorio e descubrir de preto a riqueza natural local.

A concelleira de Turismo e Cultura, Rita Pérez, destacou a importancia de abrir estas actividades tanto á veciñanza coma aos visitantes: “Queremos que Redondela sexa un referente de turismo cultural e de experiencias. Este programa permite poñer en valor o noso patrimonio inmaterial, as nosas lendas e historia, combinando o lecer cunha aprendizaxe activa e accesible para todos os públicos”. Pola súa banda, o edil de Sostibilidade, Roberto Villar, puxo o foco no respecto polo medio ambiente e o descubrimento dos ecosistemas locais: “Estes roteiros son unha ferramenta perfecta para concienciar sobre a protección da nosa biodiversidade. Desde os paseos fluviais ata a observación de aves buscamos que a xente sinta o orgullo de coidar a nosa contorna natural, cun modelo de lecer sostible e saudable”. As seguintes saídas son:

• Sábado 5: Paseo nocturno “O Río Maceiras” (21:00 – 23:00 h). De balde.

• Domingo 6: Ruta ambiental “O Bosque do Río Fondón” (10:00 – 13:00 h). De balde.

• Domingo 6: Kaiak turístico á Portela (10:30 – 12:30 h). Prezo de 20 € por persoa.

• Sábado 12: Paseo nocturno “A Punta de Cesantes” (20:30 – 23:00 h). De balde.

• Domingo 13: Ruta ambiental “O Río Pexegueiro” (Ruta curta, 10:00 – 13:00 h). De balde.

• Venres 18: Observación de Aves Limícolas, na Senda da Portela (16:00 – 18:00 h). De balde.

• Domingo 27: Ruta ambiental “Os Montes de Ventosela” (17:30 – 20:30 h). De balde.

Información e reservas. Reserva previa na Oficina de Turismo, rúa Isidoro Queimaliños, no teléfono 986 401 713 ou enviando un correo electrónico a turismo@redondela.gal.