GL 
ES 
Tres alumnas do CEP Santa Mariña, Salomé Hernández Atencio, Ariadna Gómez Otero e Sofía Fuentes Gómez, son as gañadoras do concurso de debuxo organizado po Aqualia en colaboración coa Concellería de Medio Ambiente do Concello de Redondela. Nesta actividade, de ámbito local, participaron un total de 75 nenos e nenas de 3º e 4º de primaria dos centros educativos de Redondela. A temática dos carteis tiña que centrarse no coidado da auga e do medio ambiente para acadar un desenvolvemento sostible e mellorar o planeta.
A alcaldesa de Redondela, Digna Rivas, e o concelleiro Alberto Álvarez, responsable de Medio Ambiente, recibiron no Concello ás premiadas xunto a Ramiro Gutiérrez, Xefe de servizo de Aqualia en Redondela. A gañadora do concurso, Salomé, de 4º, recibiu como agasallo unha tableta, e Ariadna e Sofía, ambas de 3º, gañaron cadanseu reloxo intelixente como finalistas.
Desde Aqualia, empresa concesionaria do abastecemento e saneamento da auga, ofreceron aos centros de ensino de Redondela un completo programa de actividades en paralelo ao concurso de debuxo. A través de cómics, vídeos, xogos e unidades didácticas a rapazada puido aprender sobre o cambio climático e a relevancia do ciclo integral da auga. Os protagonistas da campaña son uns superheroes chamados “Gardiáns Sostibles”, encargados de protexer o planeta e que inculcan aos nenos e nenas actitudes sostibles para o seu día a día.
