A alcaldesa Digna Rivas adianta que esta axuda “permitirá que poñamos en marcha, entre outros, un programa de contratación de mulleres vítimas de violencia machista para o que a Xunta leva tres anos denegándonos a subvención”

O Concello de Redondela vén de recibir o apoio do Goberno do Estado as súas políticas de igualdade coa concesión dunha axuda de 64 842,93 € para o desenvolvemento de iniciativas tendentes a afondar na igualdade e para a erradicación da violencia machista en todas as súas formas. “É a maior subvención que o Concello de Redondela recibe en toda a súa historia e vén da man dun Goberno socialista que, fronte a ambigüidade dos seus antecesores, aposta decididamente polas medidas que permitan a igualdade real entre homes e mulleres”, asegurou a alcaldesa Digna Rivas, que quixo tamén felicitar á concelleira Iria Vilaboa “polo traballo que está a realizar ao fronte da Concellería de Igualdade.

Nunca antes outro Goberno acadara o compromiso para que nos Orzamentos Xerais do Estado se destinasen, vía transferencia aos concellos, “un incremento anual de 20 millóns de euros durante os vindeiros cinco exercicios”, apunta.

Para a alcaldesa, a concesión desta axuda –da Secretaría de Estado de Igualdad y contra la violencia de Género e publicada no BOE de 2 de agosto do 2022– non é máis que “o recoñecemento ao traballo que este Goberno, dende a súa chegada ao Concello, vén desenvolvendo neste eido”. O feito de que sexa a contía máis grande xamais recibida, “danos forzas para continuar desenvolvendo políticas activas, tanto de Igualdade como de erradicación contra a violencia machista”.

Digna Rivas adianta que, entre outros proxectos que se irán dando a coñecer oportunamente, “a axuda recibida polo Goberno de Sánchez permitiranos poñer en marcha un programa de contratación de mulleres vítimas da violencia machista”, un programa, lembra a alcaldesa de Redondela, “para o que a Xunta de Galicia denegounos subvención durante tres anos co silencio cómplice do PP local”.

En todo caso a alcaldesa recalcou que grazas ao Goberno de España, “seremos quen de levar a cabo un proxecto que consideramos de vital importancia para as mulleres vítimas da violencia machista como é a súa inclusión no mercado laboral”. Lembra a alcaldesa que para estas mulleres “o traballo é a porta que lles permite saír do circulo da violencia”.

Recalcou a importancia de desenvolver iniciativas que, como esta, contribúan a que “as vítimas teñan acceso á independencia económica e persoal que é o xeito de romper definitivamente o vínculo co agresor e acadar a plena autonomía das súas vidas”.