Encontro Virtual en Redondela ao redor da figura de Xela Arias
O encontro, organizado polas Bibliotecas Municipais de Redondela, estaba dirixido aos centros de ensino superior do municipio e transmitiuse a través da plataforma Zoom, nunha actividade na que participaron arredor de 180 persoas.
Daniel Boullosa, concelleiro de Cultura de Redondela, presentou “Compártome: un achegamento a Xela Arias”, nome que recibiu a actividade. Esta gravitou ao redor da amena e dinámica exposición de Chus Nogueira sobre a figura e a obra da escritora á que se lle dedica as Letras Galegas 2021.
Mª Xesús Nogueira é doutora en Filoloxía Galega, profesora na Facultade de Humanidades de Lugo e especialista en poesía contemporánea. É editoria da Poesía Reunida de Xela Arias e unha grande estudosa desta autora.
O evento contou coa presenza de Darío Gil Arias que descubriu novos aspectos acerca da figura da súa nai.
Alumnos e alumnas dos centros participantes (IES Chapela, IES Illa de San Simón, IES Mendiño, IES Pedro Floriani e CPR Colexio Vigo) leron diversos poemas da poeta e tradutora lucense.
Esta actividade enmárcase dentro das actividades que as Bibliotecas Públicas Municipais de Redondela adican á figura de Xela Arias con motivo do Día das Letras Galegas 2021. A autora dá nome a unha das bibliotecas do municipio (o centro situado en Chapela) dende o ano 2018.