Con motivo da celebración esta semana do 22º Entroido de Verán, a Concellaría de Cultura presenta a primeira entrega da exposición fotográfica "Entroido en Redondela, unha pequena gran Historia. Parte 1".

Trátase dunha exposición dixital, aberta as 24 horas, e proxectada nos MUPIS que o Concello de Redondela ten ubicados na rúa Alfonso XII de Redondela e na Avenida de Vigo en Chapela.

Unha exposición creada para prolongarse no tempo e continuar cada entroido (de verán ou de inverno) en distintas fases. Desta vez, presentamos a primeira parte.

O traballo nace íntegramente do Arquivo do Concello de Redondela, que alberga un apartado específico de fotografías da Historia de Redondela (Arquivo Audiovisual) e que conserva a colección dos carteles creados para os eventos que o Concello de Redondela ofrece cunha certa continuidade (Festa da Coca, Festival Internacional de Títeres, Artistas na Rúa, Entroido...).

Desta vez os Mupis dixitais ofrecerán as fotografías de Entroido que a veciñanza de Redondela cedeu gratuita e desinteresadamente ó Arquivo municipal: J. A Xesteira Pazos, Ana Carreira, Juan Migueles, Familia Reboredo Surís, Antonio López, Celso Milleiro ou Malena Reboredo Blanco.

Exporase tamén parte do fondo fotográfico de Fot'sca que o Concello de Redondela mercou a D. Carlos Alonso, fotógrafo que retratou as escenas cotiás da Vila de Redondela; concretamente as fotografías tomadas polo profesional no Entroido de 1976, na Sala de festas Miramar.

A todo isto sumarase a colección recuperada dos carteis do Entroido de Verán dende o 2002 e a recopilación das noticias da Hemeroteca do Faro de Vigo relacionadas co Entroido de verán dende o 1998.

Trátase dun traballo arquivístico completo que recopila as produccións visuais, periodísticas e artísticas en relación a un tema: A HISTORIA DO ENTROIDO NO CONCELLO DE REDONDELA.

A Concellaría de Cultura aposta pola recuperación do patrimonio documental e audiovisual da nosa vila e, sobre todo, pola difusión do mesmo. Son a nosa memoria.

Agardamos que o proxecto teña un bo recibimento entre a cidadanía de Redondela e entre as persoas visitantes nestas datas.