Igualdade

A alcaldesa e a concelleira de Igualdade, Iria Vilaboa, con Alexandra Román, técnica en prevención de violencia

– A alcaldesa, Digna Rivas, explica que se trata dun servizo para atender ás persoas que estas mulleres teñen ao seu cargo, xa sexan fillos menores ou persoas maiores dependentes. “Prestarase atención e coidado inmediato, un servizo dispoñible as 24 horas, os 365 días do ano, que se prestará cando as mulleres o precisen para facer xestións pola súa situación de vítimas”.

– Este servizo pioneiro busca ofrecer un apoio “integral” ás mulleres vítimas de violencia. Rivas sinala que, malia non ser unha competencia municipal, desde o Concello faise este esforzo para facilitar as xestións que precisen realizar as mulleres que se atopan en situación de vulnerabilidade.

O concello de Redondela, a través da concellería de Igualdade, pon en marcha un servizo de atención 24 horas dirixido a mulleres vítimas de violencia machista. Trátase dun servizo para atender ás persoas que están a cargo destas mulleres, xa sexan menores ou maiores dependentes, cando as vítimas teñan que realizar trámites de denuncia, declaración ou calquera outra xestión derivada da situación de violencia. A alcaldesa, Digna Rivas, explica que se trata dun servizo “de atención e coidado inmediato, as 24 horas, os 365 días do ano, que se prestará cando as mulleres o precisen para facer xestións pola súa situación de vítimas”. Desde o departamento de Igualade sinalan que non se trata dun recurso de acollemento continuado, senón dun servizo puntual para que as mulleres poidan facer as xestión derivadas da súa situación como vítimas de violencia. Esta prestación inclúe tanto o persoal necesario para os coidados como os recursos materiais que se precisen para cubrir todas as necesidades dos menores ou persoas dependentes a cargo mentres dure o servizo.

Este servizo pioneiro busca ofrecer un apoio “integral” ás mulleres vítimas de violencia. Rivas sinala que, malia non ser unha competencia municipal, desde o Concello faise este esforzo para facilitar as xestións que precisen realizar as mulleres que se atopan en situación de vulnerabilidade. Ademais, desde o Centro de Información á Muller (CIM) de Redondela proporciónase asesoramento xurídico e atención psicolóxica. Tamén se ofrece orientación profesional, información en materia de recursos e calquera outra información encamiñada á consecución da igualdade das mulleres que o demanden.

A alcaldesa, Digna Rivas, con alumnado do IES Illa de San Simón na charla coa educadora Lucía Pereda

– A concellería de Igualdade organiza charlas informativas para o alumnado dos institutos e colexios do municipio. As temáticas abordan cuestións como a afectividade e sexualidade, así como os trastornos da conduta alimentaria que son cada vez máis frecuentes entre nenos, nenas e adolescentes.

-A alcaldesa, Digna Rivas, estivo cos alumnos do IES Illa de San Simón que asistiron á xornada impartida pola educadora social e axente de igualdade Lucía Pereda. Rivas incidiu no riscos que as redes sociais supoñen para a xente nova “polos efectos negativos sobre a súa autoestima, a confianza e a percepción do corpo”.

A concellería de Igualdade organiza charlas informativas para o alumnado dos colexios e institutos do municipio. O obxectivo destas charlas é formar aos rapaces e rapazas en educación afectivo-sexual desde a igualdade. As sesións son interactivas, participativas e dinámicas, favorecendo o intercambio de ideas. A programación inclúe tamén charlas sobre trastornos da conduta alimentaria, que son cada vez máis frecuentes entre nenos, nenas e adolescentes pola imaxe que lles trasladan as redes sociais. A alcaldesa, Digna Rivas, estivo esta mañá con alumnos e alumnas do IES Illa de San Simón que participaron na charla impartida pola educadora social e axente de igualdade Lucía Pereda. Rivas lembroulles que as imaxes que se ven nas redes están “coidadosamente seleccionadas e editadas, non son reais, e iso pode xerar malestar e afectar negativamente á autoestima e provocar graves problemas”. Para a rexedora estas charlas son “fundamentais” para que teñan acceso a información directa da man de profesionais especialistas cos que poder aclarar dúbidas ou inquedanzas.

A redondelá Lucía Pereda explica que “a presión que se vive na rapazada pola hipersexualización que se fai das mozas nos medios, as esixencias aos rapaces de demostrar a súa virilidade, son factores que inflúen directamente na súa autoestima e no seu desenvolvemento”. Abórdase tamén a influencia das plataformas dixitais na sexualidade “porque se teñen transformado en novos espazos de control e violencia”, sinala Pereda. Por estes motivos desde o Concello de Redondela entenden que este tipo de charlas formativas “son moi necesarias para a mocidade”.

As charlas, que comezaron a pasada semana, prolongaranse durante os meses de novembro, decembro e xaneiro polos diferentes centros de ensino. Trátase dunha actividade moi demandada polos centros e que tivo moito éxito en convocatorias anteriores. A concelleira de Igualdade, Iria Vilaboa, adiantou tamén que dentro da programación do 25N realizarase unha Escola de Familias para pais e nais. Nesta caso a actividade está orientada a dar asesoramento e aclarar dúbidas das familias en temas relacionados coa educación afectivo-sexual na infancia e adolescencia ou o uso das novas tecnoloxías, redes sociais e plataformas dixitais.

Un dos puntos habilitados nunha celebración anterior

– No Entroido de Verán, que se celebra o sábado, haberá dous “Espazos de Igualdade” cun punto fixo e outro itinerante. Este servizo fai unha labor non só na atención a posibles vítimas de agresións sexistas, “senón tamén de sensibilización á mocidade sobre a importancia da igualdade e o respecto” explica a concelleira Iria Vilaboa.

– A alcaldesa, Digna Rivas, lembra que o Entroido de Verán de Redondela foi desde sempre “un espazo de diversión e expresión libre e queremos que todos e todas poidan gozar en igualdade de condicións”.

No Entroido de Verán, que se celebra este sábado 23, o Concello de Redondela pon en marcha unha campaña especial con “Espazos de Igualdade”. Haberá un punto de atención instalado na praza do Concello, xunto ao hospital de campaña, e outro itinerante con Axentes de Igualdade percorrendo todos os espazos da festa. O “Espazos de Igualdade” na praza do Concello realizará tamén actividades de sensibilización coa rapazada e as familias de 18:00 a 02:00 horas. O punto itinerante, con dúas técnicas en Igualdade, percorrerá todos os espazos da festa desde as 22:00 ata as 06:00 horas. Este servizo fai unha importante labor non só na atención a posibles vítimas de agresións ou violencia sexista, senón tamén “para concienciar e sensibilizar á mocidade sobre a importancia da igualdade e o respecto nas relacións” explica a concelleira de Igualdade Iria Vilaboa. A edil explica que a campaña non vai dirixida só as posibles vítimas senón tamén a toda a sociedade, “xa que calquera persoa que presencie comportamentos machistas, agresións, insultos sexistas ou tocamentos non consentidos pode dar a voz de alarma”.

A alcaldesa, Digna Rivas, lembra que o Entroido de Verán de Redondela “foi desde sempre un espazo de diversión e expresión libre e queremos que todos e todas poidan gozar en igualdade de condicións”. Como nos últimos anos, os locais de ocio nocturno e os hostaleiros que instalan barras nas rúas e no recinto da festa colaboran tamén como “Espazos libre de violencias machistas” e contan con protocolos de actuación. A alcaldesa agradece “a implicación dos locais de hostalaría e lecer nocturno, que se suman a estas campañas e colaboran para un ocio con diversión e respecto”.