Urbanismo

– A alcaldesa, Digna Rivas, explica que este parque empresarial “está próximo a núcleos de poboación e pode ter un impacto negativo tanto no medio ambiente como na paisaxe e no patrimonio da parroquia”. A rexedora sinala que o goberno local “está do lado dos veciños, e como xa fixemos no ano 2022 volvemos presentar alegacións dentro do prazo de consulta pública”.

– Responsables do goberno local reuníronse na tarde do venres con representantes veciñais da parroquia xunto co equipo técnico para trasladarlles o traballo feito desde o Concello e informalos das alegacións que agora se presentan contra o plan de ordenación do Polígono de Louredo.

O Concello de Redondela presenta varias alegacións ao polígono industrial de Louredo proxectado pola Xunta de Galicia e que afecta a terreos da parroquia de Vilar de Infesta. A alcaldesa, Digna Rivas, explica que este parque empresarial “está próximo a núcleos de poboación e pode ter un impacto negativo tanto no medio ambiente como no patrimonio da parroquia”. A rexedora sinala que o goberno local “está do lado dos veciños, e como xa fixemos no ano 2022 volvemos encargar un informe técnico para presentar novamente alegacións dentro do prazo de consulta pública”. Este parque empresarial impulsado pola Xunta de Galicia non contempla un plan para evitar o impacto negativo que o polígono pode causar ao medio ambiente, á paisaxe e ao patrimonio de Redondela.

O informe técnico sinala que o Documento de análise e Avaliación ambiental do polígono “non tivo en conta os condicionantes en materia de protección de leitos de auga existentes na zona, nin de protección de patrimonio cultural e etnográfico”. Engade o Concello de Redondela nas súas alegacións que o planeamento para o futuro polígono “debe protexer a biodiversidade e incluír accións de mellora do medio rural e natural”. Os prexuízos para o patrimonio de Vilar son motivo tamén de alegacións contra este polígono industrial, pola proximidade do xacemento Mámoa dos Valos e por coincidir co trazado do Camiño de Santiago que pasa pola parroquia.

Os concelleiros Rita Pérez Táboas, Atonio Cabaleiro e Iria Vilaboa reuníronse na tarde do venres con representantes veciñais da parroquia de Vilar nunha xuntanza á que asistiu tamén o equipo técnico que elaborou as alegacións. A reunión serviu para trasladarlle á veciñanza o traballo feito desde o Concello e as alegacións que agora se presentan contra o plan de ordenación do Polígono de Louredo dentro do prazo de consulta pública.

– A alcaldesa, Digna Rivas, explica que os traballos van facer que esta céntrica zona sexa máis accesible para os peóns, facilitando os desprazamentos das persoas con mobilidade reducida. Instalaranse beirarrúas máis amplas, novo mobiliario urbano e iluminación máis eficiente. Crearanse máis zonas verdes sen eliminar prazas de aparcadoiro.

– Para minimizar as posibles afeccións destas obras ao tráfico, recoméndase como alternativa o desvío dos vehículos pola praza de Ponteareas.

Hoxe luns, día 23 de setembro, arrancan os traballos de humanización da rúa Salgueiral. A alcaldesa de Redondela, Digna Rivas, sinala que o obxectivo fundamental desta actuación é “a revitalización dun espazo público deteriorado e que é central na vida da vila”. As obras van permitir que esta céntrica zona de Redondela sexa “máis accesible para todas as persoas, dando prioridade aos peóns e facilitando os desprazamentos das persoas con mobilidade reducida”.

O proxecto, por importe de case un millón de euros, xa fora acordado no anterior mandato dentro do plan provincial da Deputación PON2030. As obras inclúen unha nova urbanización na rúa As Cardosas, Salgueiral e Ernestina Otero. Instalaranse beirarrúas máis amplas, novo mobiliario urbano e iluminación máis eficiente. Crearanse máis zonas verdes sen eliminar prazas de aparcadoiro. A actuación contempla tamén un escenario e unha fonte lúdica na zona sur, nun espazo que actualmente se emprega como escenario no Festival Internacional de Títeres.

Para minimizar as posibles afeccións destas obras á circulación, recoméndase como alternativa para os non residentes o desvío dos vehículos pola praza de Ponteareas. O goberno local xa celebrou o pasado 10 de setembro unha xuntanza informativa cos veciños da zona para trasladarlles toda a información relativa ás obras que comezan o próximo luns.

– O Concello de Redondela rematou os traballos de renovación integral da estrada de Subida a Cidadelle, en Chapela, nunha superficie duns 4.000 metros cadrados. Renovouse todo o firme de asfaltado e instaláronse novas canalizacións para a rede de saneamento, pluviais e abastecemento de auga. A compañía eléctrica traballa agora na retirada dos postes que quedan na estrada, e a próxima semana será eliminados.

– A alcaldesa, Digna Rivas, amosouse moi satisfeita co resultado duns traballos “demandados pola veciñanza desde hai máis de 20 anos, e moi necesarios”. O proxecto para a reforma da segunda fase xa está redactado para renovar un quilómetro máis de camiño. As obras realizaranse ao longo deste mandato.

A reforma integral da estrada de Subida a Cidadelle xa é unha realidade. O Concello de Redondela rematou os traballos nesta vía de Chapela coa renovación dunha superficie duns 4.000 metros cadrados. Renovouse todo o firme de asfaltado e instaláronse novas canalizacións para a rede de saneamento, pluviais, e abastecemento de auga. A compañía eléctrica traballa agora na retirada dos postes que quedan na estrada, e a próxima semana será eliminados.

A alcaldesa, Digna Rivas, visitou a estrada co concelleiro de Urbanismo, Antonio Cabaleiro, e amosouse “moi satisfeita co resultado dos traballos”. A rexedora afirma que con esta reforma “o goberno local cumpre coa cidadanía e dá reposta ás necesidades de mobilidade e seguridade dos residentes desta zona”. Rivas lembra que a mellora da Subida a Cidadelle “é unha demanda da veciñanza desde hai máis de 20 anos, e cando cheguei á Alcaldía non existía ningún proxecto actualizado para a renovación integral deste camiño”.

Os traballos consistiron na instaláronse novas canalizacións para a rede de saneamento, de pluviais e tamén de abastecemento de auga. Ata o de agora a zona non tiña separadas as augas pluviais e residuais, polo que nos días de choivas as augas pluviais saturaban a rede de saneamento e provocaban incidencias e desbordamentos. Coa nova canalización “vanse evitar estes problemas e que haxa desbordamentos en época de chuvias”. Tamén se renovou todo o firme de asfaltado que estaba moi deteriorado. A obra realizada contou cun orzamento de 355.465 euros, financiados con fondos do Plan Concellos 2023 da Deputación de Pontevedra.

O proxecto para acometer a segunda fase da estrada xa está rematado

A alcaldesa avanzou que “o proxecto para a segunda fase da Subida a Cidadelle xa está redactado para renovar un quilómetro máis de camiño, e as obras realizaranse ao longo deste mandato”. Rivas explicou que, como no caso da primeira fase “trátase de obras moi complexas polas características desta vía, que ten unha gran pendente” e desde o goberno local “seguimos traballando para mellorar as comunicacións en Chapela.