Igualdade

-O Concello de Redondela reafirma a súa aposta pola diversidade o próximo 28 de xuño coa creación dun gran mural en Chapela e unha festa Holi en Redondela

O Concello de Redondela reafirma a súa aposta pola diversidade cunha xornada de actividades que se celebrará o próximo venres, 28 de xuño, co gallo da conmemoración do Día do Orgullo LGTBIQ+. A concellería de Igualdade, que dirixe Iria Vilaboa, comezará as actividades ás 11.00 en Chapela, na Senda Verde, coa creación dun novo mural a cargo da artista gráfica redondelá Paula Amoedo. O novo deseño, no que participará mocidade do grupo “Axentes do cambio”, plasmará “o orgullo da cidadanía redondelá por unha sociedade diversa e tolerante” sinala Vilaboa.

As 20:00 na pista da Xunqueira celebrarase a festa Holi e un taller de maquillaxe. É a primeira vez que Redondela acolle unha festa destas características, “unha celebración de orixe hindú onde se mesturan todas as castes en harmonía, unha festa das cores que celebra as diferenzas das persoas e tamén a súa unión», explica Iria Vilaboa. Utilizaranse todas as cores do arco da vella, con pos biodegradables e hipoalerxénicos. Serán dúas horas de música, xogos e cor, cun DJ que amenizará a festa con música. Haberá tamén un taller de maquillaxe nunha carpa con monitores para que todas as persoas que asistan á festa Holi poidan maquillarse en calquera momento da actividade “e dar así máis luz e cor a esta celebración”, apunta a concelleira.

A alcaldesa, Digna Rivas, lembra que Redondela sempre apostou “pola diversidade, a tolerancia e a igualdade de dereitos, e con esta festa queremos celebrar a diferenza”. Insiste Rivas no convencemento de que “só co respecto e a tolerancia poderemos alcanzar unha sociedade máis xusta e igualitaria”.

O Concello de Redondela anima a veciñanza a sentir o orgullo de vivir nun dos municipios que máis respectan os dereitos das persoas LGTBIQ+, que apoia ás asociacións e colectivos minoritarios e que conta con bancos arco iris nas parroquias, bancos coa bandeira trans en colexios e institutos, ademais da gran bandeira no lateral do Multiusos da Xunqueira e grafitis coas cores LGTBIQ+ tanto en Chapela como en Redondela.

Motivados polas áreas de igualdade e deportes os clubs aportaron lemas para responder a pregunta que dá nome a esta proposta, co fin de visibilizar a visión da nosa mocidade sobre as desigualdades presentes no deporte e lembrar, día a día, a importancia de continuar coa loita contra calquer tipo de violencia.

Os dous lemas máis votados serán instalados nos pavillóns de A Bombonera e A Marisma a vindeira semana.

Estade atent@s!!

Pódense consultar os resultados da enquisa facendo click aquí.

As concellerías de Deportes e Igualdade convidan aos clubs a propoñer un lema respondendo á pregunta “E ti, por que loitas?” dentro do contexto da igualdade e a loita contra a violencia machista no deporte.

Os equipos teñen ata o 10 de maio para facer as súas propostas, e será a veciñanza a que elixa o lema cunha votación popular desde a web do Concello www.redondela.gal. A votación realizarase do 13 ao 15 de maio. A proposta gañadora será revelada o 17 de maio e plasmarase nun deseño gráfico que vestirá os pavillóns municipais de Redondela e A Marisma.

Dende as concellerías de Igualdade e Deportes de Redondela convidan aos clubs que adestran nos pavillóns municipais a participar nunha campaña de de igualdade no deporte baixo o lema «E ti, por que loitas?». Desde o o goberno local pretenden así “dar voz, espazo e proxección ás inquedanzas das persoas deportistas de Redondela” sinala Iván Valles, concelleiro de Deportes. A concelleira de Igualdade, Iria Vilaboa, advirte que o papel da muller no deporte “é unha carreira repleta de obstáculos e inxustizas». Os tempos están a cambiar, «e queremos crear para a nosa cidadanía un espazo no cal poidan expresarse alto e claro”.

A proposta que fan desde o Concello consiste en que cada club ou equipo achegue un lema respondendo á pregunta “E ti, por que loitas?” dentro do contexto da igualdade e a loita contra a violencia machista no deporte. Deste xeito pretenden “xerar a posta en común dos equipos, espertar pensamentos, reflexionar e reforzar aínda máis a conciencia de equipo e a loita colectiva por un obxectivo común”.

Os clubs teñen de prazo ata o 10 de maio para facer as súas propostas, e será a veciñanza a que elixa o lema a través dunha votación popular desde a web do Concello Redondela.gal. A votación realizarase do 13 ao 15 de maio. A proposta gañadora será revelada o 17 de maio, día das Letras Galegas, e plasmarase nun deseño gráfico que vestirá os pavillóns municipais de Redondela e A Marisma.

O concelleiro Iván Valles avanzou que esta campaña levarase tamén a outras instalacións deportivas do municipio, e animan aos clubs e a todos os deportistas a participar “para poñer o foco nas desigualdades que aínda existen e loitar espazos igualitarios e de corresponsabilidade no deporte”.

A campaña está financiada con fondos do Pacto de Estado contra a violencia de xénero.