– O subdelegado do Goberno explica que a actuación, debido ao alcance dos movementos de terras e a necesidade de afianzar as novas estruturas de contención, durará 6 meses, e os traballos estarán rematados no verán.

– A alcaldesa de Redondela Rivas felicita ao Ministerio de Transportes por unha actuación “que era moi necesaria e que demandamos dende o Concello polos problemas de seguridade na estrada”.

O subdelegado do Goberno en Pontevedra, Abel Losada, visitou esta semana as obras de emerxencia que se están a realizar nun tramo da estrada N-552, en Trasmañó. Na visita, na que estivo acompañado pola alcaldesa, Digna Rivas, e o concelleiro de Urbanismo, Antonio Cabaleiro, destacou que se trata dunha obra de gran envergadura para solucionar un problema de afundimento que se viña arrastrando neste punto.

As obras, a cargo do Ministerio de Transportes e Mobilidade Sostible, comezaron no pasado mes de febreiro e contan cun orzamento total de 2.505.161,54 euros e un prazo de execución de 6 meses. Foron adxudicadas polo procedemento de emerxencia, feito que Abel Losada agradeceu aos responsables da Demarcación de Estradas en Galicia “porque permitiu apurar uns trámites que se terían demorado moito máis cunha licitación ordinaria”. O subdelegado afirmou que as obras van “a bo ritmo” e que se as condicións meteorolóxicas o permiten os traballos estarán rematados no verán.

Pola súa banda, a alcaldesa, Digna Rivas, agradeceu a visita e felicitou ao Ministerio de Transportes por unha actuación que, recordou, “era moi necesaria e que demandamos dende o Concello polos problemas de seguridade na estrada, e os feitos demostran que desde o Ministerio houbo boa receptividade”.

Ancoraxes para reforzar o talude

O traballo máis complexo desta obra é a estabilización do terraplén, con traballos a máis de tres metros de profundidade para reforzar o terreo. Instalarase unhas ancoraxes para reforzar a estrutura do talude, con pezas de aceiro e formigón. Rivas explica que, deste xeito, asegúrase que non se volvan producir afundimentos. Tamén se está a reparar a rede de colectores que hai baixo o asfalto, para o que é preciso fresar toda a superficie e logo repoñer o firme afectado.

A seguridade do persoal que está realizando as obras esixe habilitar desvíos de tráfico, cortando un carril de circulación entre os puntos quilométricos 4+700 e 5+300, dando paso alternativo polo outro carril a ambos sentidos de circulación mediante regulación semafórica. Tanto Losada como a alcaldesa piden “comprensión” aos condutores que se poidan ver afectados por estas obras “xa que se trata duns traballos complexos que son necesarios para garantir a seguridade da vía”.

Os técnicos do Ministerio explicaron tamén que o material resultante do fresado do firme é trasladado a unha planta de tratamento para a reciclaxe dos diferentes compoñentes.